Sultonov o'zidan 100 pog'ona yuqoridagi tennischini mag'lub etdi

Hindistonning Puna shahrida o'tkazilayotgan ushbu "CHellenjer" turkumiga kiruvchi musobaqaning mukofot jamg'armasi 160 000 AQSH dollarini tashkil qiladi. Hamyurtimiz hozirgina yakuniga etgan ilk davra uchrashuvida turnirning uchinchi raketkasi, avstraliyalik Tristan Skulkeytni uch set natijasiga ko'ra mag'lubiyatga uchratdi - 6/3, 4/6, 6/3. 

Taqqoslash uchun, Humoyun Sultonov ayni paytda ATP reytingida 229, turnirda uchinchi raqam ostida tasniflangan Tristan Skulkeyt esa 134-pog'onadan joy olgan. Bir soatu 50 daqiqa davom etgan bahsda hamyurtimiz 5, Yashil qita vakili 15 ta eys zarbasini amalga oshirdi. Qo'shxatolar Tristanda ko'proq bo'ldi - 5 ga 3. 

Endi Humoyun Sultonov 1/8 finalda yana bir avstraliyalik tennischi, tajribali Bernard Tomichga qarshi kortga chiqadi. Dunyoning 227-raketkasi bo'lib turgan Tomich bugun 1/16 finalda reytingda o'zidan 17 pog'ona yuqorida borayotgan kolumbiyalik Nikolas Mejiani 6/2, 6/2 hisobida engdi. Tomich 10 yil avval dunyoning 18-raketkasi bo'lgan.