Superbet Poland Rapid & Blitz. Vey I rapid turniri g'olibi. Nodirbek Abdusattorovning natijasi qanday bo'ldi?

Mukofot jamg'armasi 175 000 AQSH dollarini tashkil etuvchi ushbu musobaqada dunyoning kuchli 10 nafar grossmeysteri bosh sovrin uchun bahslarga kirishgandi. Kecha rapid turniri yakunlandi va unda xitoylik Vey I 13 ochko bilan g'oliblikni qo'lga kiritdi. O'nta turda mag'lubiyatga uchramagan Magnus Karlsen 12 ochko bilan ikkinchi o'rinni egalladi. 

Dunyo reytingida 5-o'rinni egallab turgan hamyurtimiz Nodirbek Abdusattorov esa 8 ochko jamg'arib, hindistonlik Erigaysi bilan 6-7 o'rinlarni bo'lishib oldi. Kecha rapid turnirining so'nggi kuni shaxmatchilar uchta partiyada o'zaro dona surishdi. Nodirbek Vey Iga qarshi qorada donalarda o'ynab yutqazdi. Yan-Kshishtof Duda va Kirilli SHevchenko bilan durangga imzo chekdi.    

Vey I - Nodirbek Abdusattorov partiyasi 

Bugun ikki davrali blic turniriga start beriladi. Unda har bir g'alabaga 1, durangga esa 0,5 ochko taqdim etiladi. Turnir g'olibi 40 000 dollarga ega bo'ladi.   

Ishtirokchilar: Magnus Karlsen (Norvegiya, rapid 2828/blic 2886), Vey I (Xitoy, 2758/2684), Yan-Kshishtof Duda (Polsha, 2748/2766), Nodirbek Abdusattorov (O'zbekiston, 2733/2661), Rameshbabu Pragnanandha (Hindiston, 2704/2675), Anish Giri (Niderlandiya, 2687/2715), Arjun Erigaysi (Hindiston, 2671/2744), Dommaradju Gukesh (Hindiston, 2649/2651), Vinsent Kaymer (Germaniya, 2647/2610), Kirill SHevchenko (Ruminiya, 2622/2546).