Superligada istefo: Baxtiyor Ashurmatov o'z lavozimini tark etdi

"Buxoro" bosh murabbiyi Baxtiyor Ashurmatov championat.asia saytiga istefoga chiqqani haqida malum qildi.

Joriy mavsumdan etiboran "Buxoro" bosh murabbiyiga aylangan Baxtiyor Ashurmatov o'z arizasiga binoan istefo chiqarildi.

Termizdagi "Surxon"ga qarshi o'yinda uchralgan mag'lubiyatdan keyin mutaxassis "Buxoro"ga o'zgarish foyda keltirishini rahbariyatga malum qilib, istefo chiqishi haqida bildirgan. Ammo klub rahbariyati Ashurmatovni jamoada olib qolishni istagan. Biroq bugun Ashurmatov rahbariyat bilan bo'lgan navbatdagi suhbatdan keyin ketishga qaror qilganini tushuntirgan va bu o'zgarish jamoa foydasiga xizmat qilishini takidlagan.

SHu tariqa mazkur istefo Superligada joriy mavsumdagi ikkinchi murabbiy o'zgarishi bo'ldi. Bunga qadar "So'g'diyona"da murabbiy o'zgargan va Lushan o'rniga Ulug'bek Baqoev tayinlangandi.

Qayd etish kerakki, o'tgan mavsum avvalida mazkur ikkala mutaxassis "Buxoro"da birga faoliyat ko'rsatishgandi. Keyinroq Ashurmatov AGMK ruliga o'tib ketib, olmaliqliklar bilan O'zbekiston Kubogida g'olib chiqishni uddalagandi.

Eslatib o'tamiz, ayni paytda "Buxoro" chempionatda 8-turdan keyin 6 ochko jamg'argan holda turnir jadvalida 13-o'rinni egallab turibdi.

Ashurmatov qo'l ostida "Buxoro" o'tkazilgan 8 uchrashuvda 1 g'alaba, 3 durang va 4 mag'lubiyat qayd etgan.