Superunited Rapid & Blitz Croatia. Magnus chempion bo'lgan turnirda Abdusattorov nechanchi o'rinni egalladi?

Mukofot jamg'armasi 175 000 AQSH dollarini tashkil etuvchi musobaqa rapid va blic yo'nalishlarida o'tkazildi. Unda Magnus Karlsen, Gukesh Dommaradju, Fabiano Karuana singari shaxmat yulduzlari qatorida hamyurtimiz Nodirbek Abdusattorov ham sovrinli o'rinlar uchun dona surdi.    

Musobaqaning so'nggi ikki kuni ishtirokchilar blic, yani tezkor shaxmatda o'zaro hisob-kitob qilishdi. Nodirbek Abdusattorov 18 ta partiyaning teng yarmi, yani 9 tasida g'alaba qozonishga muvaffaq bo'ldi. Beshta uchrashuvda durang o'ynagan bo'lsa, 4 tasida imkoniyatni boy berdi. 

So'nggi kun blic bahslarida Magnus Karlsen, amaldagi jahon chempioni Gukesh Dommaradju, Ivan Sarich, Rameshbabu Praggnanandha va Anish Girini mag'lub etishning uddasidan chiqdi. Bu bilan Nodirbek blic turnirida 12 ochko bilan qo'shimcha ko'rsatkichlarga ko'ra 3-o'rinni egalladi. Ikkinchi o'rindagi Uesli So hisobida ham 12 ochko bor. Magnus Karlsen 12,5 ochko bilan blic turniri g'olibi bo'ldi.  

SHu tariqa, Nodirbek Abdusattorov rapid va blic turniri natijalariga ko'ra 18 ochko bilan 6-o'rinni band etdi. Rapid bahslaridagi omadsiz ishtirok Abdusattorovga yakunda qimmatga tushdi. To'rtinchi hamda beshinchi o'rinlardagi Yan-Krishtoff Duda va Alireza Firuzdja hisobida 19 tadan ochko bor. Agar blicning so'nggi turida Nodirbek Alirezani yutganida hozir o'rinlar almashib turgan bo'lardi. 

Kutilganidek, Magnus Karlsen 22,5 ochko jamg'arib, Superunited Rapid & Blitz Croatia chempioniga aylandi. Uesli So 20 ochko bilan ikkinchi o'rindan joy olgan bo'lsa, Gukesh Dommaradju 19,5 ochko bilan kuchli uchlikka yakun yasab berdi.