Suzuvchilarimiz RIOZMIda shug'ullanishmoqda

Vakillarimizni aprel oyida Tokio Olimpiadasiga yo'llanma beruvchi musobaqa kutib turibdi. SHu bois ham terma jamoamiz azolari ushbu licenzion turnirlarga jiddiy hozirlik ko'rishmoqda.

Respublika ixtisoslashtirilgan Olimpiya zaxiralari maktab internati havzasida suzish va para-suzish bo'yicha terma jamoamiz vakillarining qo'shma yig'ini davom etmoqda. Ayni paytda butun dunyo bo'yicha bir qator musobaqalar koronavirus sabab bekor qilinyapti. SHu bois har ikki jamoamiz o'zaro tajriba almashgan holda bo'lajak bahslarga hozirlik ko'rishni maqul ko'rdi.

“Bo'lajak musobaqalarga yaxshi tayyorgarlik olib bormoqdamiz. Yaratib berilayotgan barcha sharoitlar uchun hukumatimizga tashakkur aytib o'tmoqchiman. Biz esa bunga javoban katta mehnat qilmoqdamiz. Men 50 va 100 metr masofalarga suzish bo'yicha Tokio-2020 Olimpiya o'yinlariga yo'llanma olishni niyat qilganman. Aprel oyida o'tadigan Jahon kubogida Olimpiada normativini bajarishni maqsad qilganman”, – dedi terma jamoamiz vakili Natalya Kritinina.

Atletlarimizning mashg'uloti reja asosida olib borilmoqda. 27 daraja iliqlikdagi suv haroratida kuniga 2 mahal o'tkazilayotgan mashg'ulotlar suzuvchilarimizning mahoratini yanada oshirishga xizmat qilishi tabiiy.