Tarixiy natija - Javohir Sindarov "Nomzodlar turniri" g'olibi sifatida Jahon toji uchun o'ynaydi!

Hozirgina grossmeysterimiz 13-turda qora donalarda o'ynaganiga qaramay, niderlandiyalik Anish Giri bilan durang qayd etdi. Aynan Giri Sindarovning eng yaqin taqibchisi bo'lib, o'rtadagi farq ikki ochkoni tashkil etayotgandi. Bugungi durangdan keyin ikki ochkolik farq saqlanib qoldi va ertaga o'tkaziladigan so'nggi 14-tur natijasidan qati nazar, Javohir Sindarov "Nomzodlar turniri" chempioniga aylandi. Javohirning ochkolari 9,5, Giriniki 7,5 taga etdi. 

Malumot uchun, amaldagi Jahon Kubogi g'olibi bo'lgan Javohir Sindarov Jahon toji uchun o'ynash imkoniyatini beradigan turnirda ishtirok etayotgan birinchi o'zbek shaxmatchisi hisoblanadi. O'n to'rt turdan iborat mazkur turnir g'olibi jahon toji uchun hindistonlik Gukesh Dommarajuga qarshi dona surish huquqini qo'lga kiritardi. Musobaqani mag'lubiyatsiz yakunlayotgan Javohir ana shu yagona yo'llanma sohibiga aylandi. 

Gukesh Dommarajuga qarshi Jahon toji uchun match shu yilning noyabr oxiri yoki dekabr oyi boshida bo'lib o'tadi. Hozircha match manzili aniq emas.