Tata Steel Chess-2023. Nodirbek durangchi Arjunga, Javohir esa Elin xonimga qarshi o'ynaydi

Tata Steel Chess-2023 musobaqasida shaxmatchilarimiz Nodirbek Abdusattorov va Javohir Sindarov ham muvaffaqiyatli dona surishyapti. Nodirbek "Masters", Javohir esa "CHellenjer" guruhida o'z mahoratini namoyish etmoqda. 

Birozdan so'ng 7-tur uchrashuvlari start oladi. "Masters", yani kuchlilar guruhida peshqadamlik qilayotgan Nodirbek bugun qora donalarda Arjun Erigaysiga qarshi bahs olib boradi. Hindistonlik shaxmatchi o'tkazilgan 6 ta partiyaning barchasida raqiblari bilan durang natija qayd etgan. Abdusattorov esa 3 g'alaba va 3 durang bilan turnir jadvalida peshqadamlikni davom ettirmoqda. 18 yoshli Nodirbekda 4,5 ochko bo'lsa, Arjun 3 ochko bilan 8-pog'onada boryapti.  

"Masters". 7-tur

Arjun Erigaysi (Hindiston, 2722) - Nodirbek Abdusattorov (O'zbekiston, 2713)

Dommaraju Gukesh (Hindiston, 2725) - Uesli So    (AQSH, 2760)

Parxam Magsudlu (Eron, 2719) - Fabiano Karuana (AQSH, 2766)

Magnus Karlsen (Norvegiya, 2859) - Rixard Rapport (Ruminiya, 2740)

Rameshbabu Pragnanandxa (Hindiston, 2684) - Yorden van Forest (Niderlandiya, 2681)

Levon Aronyan (AQSH, 2735) - Anish Giri (Niderlandiya, 2764)

Vinsent Kaymer (Germaniya, 2696) - Din Lijen (Xitoy, 2811)

Bugun "CHellenjer" guruhida ham 7-tur uchrashuvlari o'tkaziladi. Javohir Sindarov (2654) bu turda niderlandiyalik 17 yoshli Elin Robers (2361)ga qarshi oq donalarda o'ynaydi. Hamyurtimiz 6 imkoniyatdan 4 ochko jamg'arib, turnir jadvalida qo'shimcha ko'rsatkichlarga ko'ra 4-o'rinni egallab turibdi. Peshqadam Mustafo Yilmaz (Turkiya, 2609) hisobida 4,5 ochko bor.