Tata Steel Chess-2023. Nodirbek hamon peshqadam, Javohir 2-o'ringa ko'tarilib oldi (turnir jadvali)

Tata Steel Chess-2023 musobaqasida shaxmatchilarimiz Nodirbek Abdusattorov va Javohir Sindarov ham muvaffaqiyatli dona surishyapti. Nodirbek "Masters", Javohir esa "CHellenjer" guruhida o'z mahoratlarini namoyish etmoqdalar. 

Kecha o'tkazilgan 7-tur uchrashuvlarida har ikki yosh grossmeysterimiz g'alaba nashidasini surdi. "Masters", yani kuchlilar guruhida peshqadamlik qilayotgan Nodirbek qora donalarda o'ynashiga qaramay, Arjun Erigaysiga ilk mag'lubiyatni taqdim etdi. Hindistonlik shaxmatchi bungacha o'tkazilgan 6 ta partiyaning barchasida raqiblari bilan durang natija qayd etgandi. Abdusattorov 7 imkoniyatdan 5,5 ochko jamg'arib, hamon yakka peshqadamlikni davom ettirmoqda. Kuchli uchlikdan joy olgan Anish Giri (Niderlandiya) va Uesli So (AQSH) hisobida 4,5 tadan ochko bor.  

"CHellenjer" guruhida qatnashayotgan Javohir Sindarov (2654) esa 7-turda niderlandiyalik 17 yoshli Elin Robers (2361)ga qarshi oq donalarda o'ynadi va g'alabaga erishdi. Hamyurtimiz 7 imkoniyatdan 5 ochko jamg'arib, turnir jadvalida 4-pog'onadan 2-o'ringa ko'tarilib oldi. Germaniyalik Aleksandr Donchenko 5,5 ochko bilan karvonboshi bo'lib turibdi. Mustafo Yilmaz (Turkiya) 4,5 ochko bilan 3-o'ringa yakun yasagan.