Tata Steel Chess 2026. Abdusattorov ham, Sindarov ham 4-turda g'alaba qozonib, kuchli uchlikka kirdi

Turnirning kuchlilar jam bo'lgan "Masters" guruhida dunyoning etakchi 14 nafar grossmeysteri qatorida hamyurtlarimiz Nodirbek Abdusattorov va Javohir Sindarov ham bosh sovrin uchun bahs olib boryapti. 

Quvonarlisi, kecha o'tkazilgan 4-turda har ikki grossmeysterimiz raqiblarini mag'lub etishni uddalashdi. Nodirbek Abdusattorov oq donalarda chexiyalik Tay Dai Van Nguenni, Javohir Sindarov esa qora donalarda o'ynaganiga qaramay, germanniyalik Mattias Blubaumni mag'lubiyatga uchratdi.

Tata Steel Chess turnirining amaldagi chempioni, hindistonlik Rameshbabu Praggnanandha bu turda amaldagi jahon chempioni Gukesh Dommaradju bilan murosaga keldi. Amerikalik Xans Mok Niemenn qora donalarda hindistonlik Aravindx CHitambaramni mag'lub etishni uddaladi. 

To'rtinchi turdan so'ng ayna Niemann 3 ochko bilan turnir jadvalida qo'shimcha ko'rsatkichlarga ko'ra birinchi o'rinni egallab turibdi. Nodirbek Abdusattorov hislbida ham 3 ochko bor va u qo'shimcha koeficentlarga ko'ra ikkinchi o'rinni band etgan. U ikki g'alaba va ikki durang qayd etgan. Uchta uchrashuvda durang, bittasida zafar quchgan amaldagi Jahon kubogi sohibi Javohir Sindarov esa 2,5 ochko bilan qo'shimcha koeficentlarga ko'ra 11-pog'onadan 3-o'ringa ko'tarilib oldi. 

Tata Steel Chess 2026. 4-tur natijalari:

Nodirbek Abdusattorov (O'zbekiston) — Tay Dai Van Nguen (CHexiya) 1-0

Anish Giri (Niderlandiya) — Arjun Erigaisi (Hindiston) 0,5-0,5

Mattias Blubaum (Germaniya) — Javohir Sindarov (O'zbekiston) 0-1

Aravindx CHitambaram (Hindiston) — Xans Niemann (AQSH) 0-1

Gukesh Dommaraju (Hindiston) — Rameshbabu Pragnanandxa (Hindiston) 0,5-0,5

Vladimir Fedoseev (Sloveniya) — Yorden van Forest (Niderlandiya) 0,5-0,5

Yagiz Kaan Erdogmush (Turkiya) — Vinsent Keymer (Germaniya) 0,5-0,5  

Bugun musobaqada 5-tur uchrashuvlari o'tkaziladi va bizning vaqt bilan odatdagidek soat 18:00da boshlanadi. Unda Nodirbek Abdusattorov qora donalarda amerikalik Xans Mok Niemannga qarshi bahs olib boradi. Javohir Sindarov esa oq donalarda turkiyalik 14 yoshli grossmeyster Yagiz Kaan Erdogmush bilan hisob-kitob qiladi.