Tata Steel Chess 2026. O'zbek derbisi bo'lib o'tdi. Turnir jadvalida vaziyat o'zgardimi?

Turnirning kuchlilar jam bo'lgan "Masters" guruhida dunyoning etakchi 14 grossmeysteri qatorida hamyurtlarimiz Nodirbek Abdusattorov va Javohir Sindarov ham bosh sovrin uchun bahs olib boryapti. Kechagi tur oldidan Nodirbek 5,5 ochko bilan birinchi, 5 ochkoga ega Javohir ikkinchi o'rinni egallab turgandi.  

Etiborlisi shundaki, 9-turda o'zbek derbisiga guvoh bo'ldik. Oq donalarda o'ynagan Sindarov Abdusattorov bilan durangga imzo chekdi. Bu turnir jadvali nuqtai nazaridan ideal hisob bo'ldi deyish mumkin. Agar Javohir g'alaba qozonganida, 6 ochko bilan peshqadamga aylanib olar edi. 

Sindarov musobaqadagi mag'lubiyatsiz yurishini davom ettirmoqda. Nodirbekka yutqazgan amaldagi jahon chempioni Gukesh Dommaradju bu safar ham imkoniyatni boy berib qo'ydi. Turnirni omadsiz o'tkazayotgan Gukesh oq donalarda o'ynaganiga qaramay, germaniyalik Mattias Blubaumga yutqazdi. Turkiyalik 14 yoshli grossmeyster Yagiz Kaan Erdogmush qora donalarda o'ynab, chexiyalik Tay Dai Van Nguenni engdi va ochkolarini Sindarovga etkazib oldi. Niderlandiyalik Yorden van Forest ham ochkolarini 5,5 taga etkazdi. Tata Steel Chess turnirining amaldagi chempioni, hindistonlik Rameshbabu Praggnanandha 9-turda nihoyat g'alaba qozondi. U vatandoshi, turnir autsayderi Aravindx CHitambaramdan ustun keldi. 

Tata Steel Chess 2026 9-turidan so'ng Nodirbek Abdusattorov 6 ochko bilan yakka peshqadamligini davom ettirmoqda. Javohir Sindarov 5,5 ochko bilan qo'shimcha ko'rsatkichlarga ko'ra 2-o'rinni saqlab qoldi. Yagiz Kaan Erdogmush va Yorden van Forest hisobida ham 5,5 ochkodan bor. Amaldagi jahon chempioni Gukesh 4 ochko bilan 10-pog'onadan joy olgan.  

Tata Steel Chess 2026. 9-tur natijalari:

Gukesh Dommaraju (Hindiston) — Mattias Blubaum (Germaniya) 0-1 

Tay Dai Van Nguen (CHexiya) — Yagiz Kaan Erdogmush (Turkiya) 0-1 

Anish Giri (Niderlandiya) — Vladimir Fedoseev (Sloveniya) 0,5-0,5 

Javohir Sindarov (O'zbekiston) — Nodirbek Abdusattorov (O'zbekiston) 0,5-0,5 

Yorden van Forest (Niderlandiya) — Vinsent Keymer (Germaniya) 1-0

Arjun Erigaisi (Hindiston) — Hans Niemann (AQSH) 0,5-0,5

Rameshbabu Pragnanandha (Hindiston) — Aravindx CHitambaram (Hindiston) 1-0

Bugun o'tkaziladigan 10-turda Nodirbek Abdusattorov oq donalarda sloveniyalik Vladimir Fedoseevga qarshi bahs olib boradi. Javohir Sindarov ham oq donalarda mezbonlar vakili Yorden van Forest bilan hisob-kitob qiladi. Uchrashuvlar bizning vaqt bilan soat 18:15da boshlanadi.