Tata Steel Chess India. Nodirbek Abdusattorov mag'lubiyatsiz odimlamoqda

O'z tarixida oltinchi bor o'tkazilayotgan nufuzli musobaqaning mukofot jamg'armasi 41 500 AQSH dollarini tashkil etadi. Turnir 9 tur rapid (25+10) va 18 tur blic (3+2) yo'nalishida o'tkaziladi va unda birinchi raqamli shaxmatchimiz Nodirbek Abdusattorov ham bosh sovrin uchun bahs olib bormoqda. 

Rapid va blic yo'nalishlari uchun alohida g'olib aniqlanadigan "Tata Steel Chess India" turnirida Magnus Karlsen ham ishtirok etyapti. Aynan u kechagi ikkinchi kun bahslaridan so'ng 5 ochko bilan peshqadam bo'lib oldi. Uning hisobida 4 g'alaba va 2 durang bor. Magnus kechagi 3 ta partiyaning barchasida g'alaba qozongani ham etiborga molik holat.  

Nodirbek esa birinchi kungi bahslardan so'ng turnir jadvalida yakka peshqadam bo'lib olgandi. U kecha o'tkazilgan 3 ta partiyaning 2 tasida durang natija qayd etib, uchinchisida g'alaba qozondi. Abdusattorov 4-turda qora donalarda Nihal Sarin (Hindiston, 2679), 5-turda oq donalarda yana bir hind grossmeysteri Vidit Santosh Gujrathi (2661) bilan murosaga keldi. Sunildat Narayanan (Hindiston, 2579)ga qarshi qora donalarda o'ynashiga qaramay, muhim g'alabani qo'lga kiritdi.

Hamyurtimiz uchinchi kun oldidan turnir jadvalida 4,5 ochko bilan sof ikkinchi o'rinni egallab turibdi. Amerikalik grossmeyster Uesli So 3,5 ochko bilan kuchli uchlikka yakun yasagan. Daniil Dubov va Pragnanandha hisobida 3 tadan ochko bor.