Tennischilarimizning "Devis Kubogi" doirasidagi Bosniya va Gercegovinaga qarshi o'yini yana o'sha abgor kortda o'tkaziladi

Bosniya va Gercegovina bilan bahs I Jahon guruhi uchun pley-off bosqichi doirasida bo'lib o'tadi.

O'yinlar 31 yanvar — 1 fevral kunlari poytaxtimizdagi Respublika Olimpiya zaxiralari tennis maktabi yopiq kortlarida tashkil etiladi. Ilk kungi uchrashuvlar soat 13:00da, 1 fevraldagisi esa 11:00 da boshlanadi.

O'zbekiston terma jamoasi ushbu qarama-qarshilikda g'alaba qozonish orqali yana I Jahon guruhiga qaytishi mumkin.

Jamoalar shu kungacha o'zaro o'yin o'tkazishmagan. Bosniya va Gercegovina terma jamoasi so'nggi uchrashuvini o'tgan yilning sentyabrida I Jahon guruhi doirasida Xitoy Taypeyiga qarshi o'tkazib, 2:3 hisobida imkoniyatni boy bergan edi.

Malumot uchun, O'zbekiston terma jamoasi "Devis Kubogi" reytingida 287,5 ochkoga ega bo'lgan holda 42-o'rinni egallab turibdi. Bosniya va Gercegovina esa reytingda 30-o'ringa joylashgan.

Eslatib o'tamiz, O'zbekiston tennis federaciyasi 2023 yil AQSHga qarshi o'yinlarni ham shu kortda o'tkazgan va tanqid ostiga olingandi.