Top-5'dagi yana bir tennischi "Rolan Garros" bilan xayrlashdi

Jahonning 5-raketkasi, estoniyalik Anett Kontaveyt Franciya Ochiq chempionatining birinchi davrasida WTA reytingida 42-o'rinni egallab turgan avstraliyalik Ayla Tomlyanovichga 6/7, 5/7 hisobida yutqazib qo'yib, ilk davradanoq musobaqa bilan xayrlashdi.

Uchrashuv bir soatu 53 daqiqa davom etdi. Ushbu vaqt davomida Anett ettita eys, ikkita breyk va bitta qo'sh xato qayd etdi. Ayla esa ikkita eys, uchta breyk amalga oshirib, oltita qo'sh xatoga yo'l qo'ydi. Tennischilar o'zaro uchinchi bor to'qnash kelishdi va avstraliyalik birinchi marta g'alaba qozondi.

Turnirning uchinchi davrasiga chiqish uchun Tomlyanovich rossiyalik Varvara Grachevaga qarshi bahs olib boradi.