Toshkent Open-2018 g'olibasi Lincda 10-raketkani mag'lub etdi

Uch hafta avval poytaxtimizda tashkil etilgan “Toshkent Open-2018” turnirida bosh sovrinni qo'lga kiritgan Margarita Gasparyan Linc musobaqasida muvaffaqiyatli odimlayapti. Rossiyalik tennischi Kiki Bertensni mag'lub etib, chorak final ishtirokchisiga aylandi. 

Dunyoning 137-raketkasi bo'lib turgan Gasparyan Upper Austria Ladies Linz turnirining 2 soatu 19 daqiqa davom etgan ikkinchi davra bahsida WTA reytingida 10-o'rinni egallab turgan gollandiyalik kuchli raqibasini 7/5, 2/6, 7/6(3) hisobida taslim etdi. Bugun Margarita chorak finalda italiyalik Kamila Jorjiga qarshi kortga chiqadi.