Toshkentda nufuzli shaxmat turniri kutilmagan natijalar bilan boshlandi (1-turning barcha natijalari)

Mukofot jamg'armasi 75 000 AQSH dollarini tashkil qiluvchi turnir shveycarcha tizimda 10 turdan iborat bo'ladi. Ishtirokchilar ikki guruhda sovrinli o'rinlar uchun bahs olib borishadi. Asosiy hisoblangan A guruhida 1800 va undan yuqori reytingli shaxmatchilar jam bo'lgan. V guruhida esa reytingi 1999 va undan past bo'lgan ishtirokchilar dona suradi. 

Kuchlilar jam bo'lgan A guruhida hindistonlik xalqaro grossmeyster Nihal Sarin (2687) birinchi raqam ostida saralangan. U 1-turda hamyurtimiz Behruz Umarov (2218)dan ustun keldi. Ikkinchi raqamli shaxmatchi sifatida tasniflangan yosh grossmeysterimiz SHamsiddin Vohidov (2670) kutilmaganda yana bir vakilimiz Azamat Daurimetov (2199) bilan durang o'ynaydi.    

Grossmeysterimiz Muhiddin Madaminov (2550) hindistonlik Sirin Kalyani (2142)ni engdi. Birinchi turda Almas Rahmatullaev, Abdumalik Abdusalimov, Ortiq Nig'matov, Sayidakbar Saydaliev, Humoyun Begmuratov, Muhammadzohid Suyarov singari etakchi shaxmatchilarimiz g'alaba qozonishdi.