Toshkentda Vatan himoyachilari kuniga bag'ishlangan musobaqa tashkil etildi

SHu munosabat bilan O'zbekiston Milliy olimpiya qo'mitasi hamda O'zbekiston Respublikasi Mudofaa vazirligi hamkorligida poytaxtimizda yugurish musobaqasi tashkil qilindi. 10 km masofaga o'tkazilgan bellashuvlarda 500 nafardan ziyod ishtirokchi o'z omadini sinab ko'rdi.

Qatnashchilar Mirzo Ulug'bek ko'chasidan «Xalqlar do'stligi» maydonidagi marragacha yugurishdi.

Erkaklar o'rtasidagi bahslarda SH.Davletov, V.Mamedov, Z.Mamatqulov, E.Fadeev, A.Petrov, B.Safarov marraga birinchilardan bo'lib etib kelishdi. Ayollar o'rtasida esa E.Tunguskova, M.Xmelevskaya, M.Muhitdinova, Z.Xudoyberdieva, V.Grishina, M.Baratova kuchli oltilikni tashkil etib berishdi.

«Bugungi musobaqa men uchun juda omadli bo'ldi. Bahslarda birinchi o'rinni oldim. Yil ajoyib boshlanganidan xursandman. Sport bilan barcha shug'ullanishi lozim. Bu sog'liq uchun juda foydali. Yaqinlashib kelayotgan bayram, 14 yanvar – Vatan himoyachilari kuni bilan barchani tabriklayman», – dedi musobaqa g'olibasi Ekaterina Tunguskova.