Uch karra Osiyo o'yinlari g'olibasi - Svetlana Radzivil!

Svetlana engil atletikaning balandlikka sakrash yo'nalishiga ixtisoslashgan o'zbekistonlik sportchimizdir.

U engil atletikadagi faoliyatini ko'pkurash bilan shug'ullanishdan boshlagan va bu yo'nalishda ko'plab musobaqalarda qatnashgan. Keyinchalik esa balandlikka sakrash bilan astoydil shug'ullana boshladi.

Uning birinchi yirik starti 2002 yilda Kingstonda o'tgan o'smirlar o'rtasidagi jahon chempionati bo'lib, unda o'zbekistonlik sportchi 1,70 metrga sakrab, 19-o'rinni egallaydi. Xalqaro miqyosdagi birinchi muvaffaqiyati esa 2004 yilda o'smirlar o'rtasidagi Osiyo chempionatidagi kumush medaliga to'g'ri keladi.

Svetlana 19 yoshida bir mavsum ichida uchta yirik musobaqaning oltin medal sohibasiga aylandi. Bular yopiq inshootlardagi Osiyo chempionati, o'smirlar o'rtasidagi qita va jahon chempionatlaridir. Bu davrda u allaqachon 1.90 metr balandlikni zabt etib ulgurdi.

Radzivil 2010 yil Osiyo o'yinlarida 1,95 balandlik bilan g'olib bo'lgan. 2011 yil hamyurtimiz Osiyo chempionatida kumush medalni qo'lga kiritdi va jahon chempionatida sakkizinchi bo'ldi. SHuningdek, u 2014 yilda yopiq inshootlardagi Osiyo chempionatida yuqori natijalarni ko'rsatdi – 1.96 metr (yopiq inshootlardagi shaxsiy rekord). Bu natija bilan hamyurtimiz Osiyo chempionati g'olibga aylandi.

2018 yilga kelib esa, Svetlana Osiyo o'yinlarining uch karra chempioniga aylandi. SHu bilan birga hamyurtimiz musobaqa rekordini ham yangiladi – 1.96 metr.

Svetlana Radzivil xalqaro turnirlardagi g'alaba va medallar shodasidan tashqari davlat mukofotlarini ham qo'lga kiritgan:
• «SHuhrat» medali (2007),
• «Do'stlik» ordeni (2013),
• O'zbekiston Respublikasida xizmat ko'rsatgan sportchi (2019).