Uch shaxmat malikasida bir xil ochko, JK yo'llanmasi hamyurtimizga nasib etdi

Ayollar o'rtasida o'tkazilgan musobaqaning so'nggi to'qqizinchi turidan so'ng uch nafar shaxmatchi bir xil ochko jamg'ardi. Xalqaro grossmeysterimiz Gulruhbegim Tohirjonova oq donalarda qozog'istonlik Meruert Kamalidenovani mag'lub etdi. Nilufar Yoqubboeva qora donalarda harakat qilishga qaramay, xalqaro master Bahora Abdusattorovani engdi. 

So'nggi tur oldidan peshqadam bo'lib turgan qozog'istonlik Bibisara Assaubaeva oq donalarda hamyurtimiz Sarvinoz Qurbonboevaga qarshi o'ynadi. Agar bu matchda Bibisara g'alaba qozonganida, Jahon kubogiga yo'llanmani aynan u qo'lga kiritardi. Sarvinoz esa bunga yo'l qo'ymadi. Uchrashuv durang natija bilan yakunlandi. 

Natijada bir yo'la uch nafar shaxmatchi - Nilufar Yoqubboeva, Gulruhbegim Tohirjonova va Bibisara Assaubaeva 7 tadan ochko jamg'arishdi. Qo'shimcha ko'rsatkichlarga ko'ra Yoqubboeva birinchi o'rinni egalladi hamda Jahon kubogi yo'llanmasini qo'lga kiritdi. Grossmeysterimiz Sarvinoz Qurbonboevaga rahmat! 

Ayollar musobaqasi reglamentiga ko'ra Jahon kubogi yo'llanmasi faqat saralash turniri g'olibiga taqdim etiladi. Nilufar Yoqubboeva 2020 yilning 21 sentyabr - 15 oktyabr kunlari oralig'ida Belarus poytaxti Minsk shahrida bo'lib o'tadigan Jahon kubogida nafaqat O'zbekiston, balki Markaziy Osiyo mintaqasi sharafini himoya qiladi.