Uimbldon. Erkaklar o'rtasidagi juftlik bahslarida 3 ta matchboldan chiqib ketgan tandem chempion bo'ldi

Erkaklar o'rtasidagi musobaqa bosh sovrini finlyandiyalik Xarri Xeliovaara va britaniyalik Genri Pattenga nasib etdi. Ular hal qiluvchi final uchrashuvida haqiqiy qahramonlik ko'rsatishdi. Bu juftlik deyarli 3 soat davom etgan bahsda 3 ta matchboldan chiqib ketishga muvaffaq bo'ldi. 

Xeliovaara va Patten hamkorligi finalda avstraliyalik tennischilar Maks Pyorsell hamda Jordan Tompson juftligini irodali tarzda mag'lubiyatga uchratdi - 6/7(7), 7/6(8), 7/6(11:9). Uchchala set ham tay-brekka qadar etib borgani uchrashuvning qanchalik murosasiz kechganini ko'rsatmoqda. 

Bahs davomida Xeliovaara va Patten 2, Pyorsell hamda Tompson 15 ta eys zarbasini amalga oshirgan. Har ikkala juftlik ham biron martta raqiblari geymini yutib ololmagan. Yani, breykdan hech qaysi juftlik foydalana olmagan. Xeliovaara va Patten faoliyatlarida ilk bor "Katta Dubulg'a" turnirida chempion bo'lishdi. Ular birgalikda 2000 reyting ochkosi va 650,000 funt sterling mukofot pulini ham qo'lga kiritishdi. Pyorsell va Tompson esa 1200 ochko hamda 330,000 funtga ega chiqdi.