Umida Omonova FIDE Jahon kubogining uchinchi bosqichiga chiqdi

Ushbu nufuzli musobaqada O'zbekiston terma jamoasining uch nafar etakchi vakilalari ham ishtirok etayotgandi. Ulardan Umida Omonova kuchli raqibalarini mag'lubiyatga uchratib, uchinchi davraga yo'l oldi. Umida Evropa chempioni, polshalik Alina Kalinskaya bilan durang o'ynagan edi. Hal qiluvchi tay-brekda u nomdor raqibasini mag'lub etishni uddaladi. 

Gulruhbegim Tohirjonovaning xitoylik xalqaro sport ustasi Lu Miaoyiga qarshi bahsi taqdiri ham tay-rekda hal bo'ldi. Qiyin vaziyatdan g'alaba yo'lga chiqib olgan Gulruhbegim muhim pallada yo'l qo'yilgan xato evaziga imkoniyatni boy berib, jahon kubogidagi ishtirokini yakunladi. 

Eslatib o'tamiz, yoshlar o'rtasida ikki karra jahon chempioni hisoblangan Afruza Hamdamova ikkinchi davrada hindistonlik grossmeyster, rapid yo'nalishida ikki karra jahon chempioni Hampi Koneruga 0,5:1,5 hisobida yutqazib qo'ygan edi.   

Bugun Umida Omonova uchinchi davrada qozog'istonlik Elnaz Kaliaxmetga qarshi dona suradi. Elnaz ikkinchi bosqichda gruziyalik nomdor raqibasi Nino Baciashvilidan 1,5:0,5 hisobida ustun keldi.