Urganchda duatlon bo'yicha g'oliblar aniqlandi + FOTO

O'zbekiston Respublikasi mudofaasiga ko'maklashuvchi “Vatanparvar” tashkiloti Xorazm viloyati kengashi tasarrufidagi viloyat texnik va amaliy sport turlari markazi tomonidan yoshlarni sportning texnik va amaliy turlariga bo'lgan qiziqishini oshirish, ularni sog'lom ruhda voyaga etkazish maqsadida belgilangan reja asosida sport musobaqalari o'tkazib kelinayotir.

Xususan, Urganch tumanining CHolish qo'rg'onida joylashgan o'quv-mashq maydonida duatlon bo'yicha tashkil etilgan Xorazm viloyati kubogining birinchi bosqichi ham ana shular sirasiga kiradi.

“Yangi O'zbekistonda erkin va farovon yashaylik!” shiori ostida uyushtirilgan mazkur musobaqada vohaning shahar va tumanlaridan kelgan 60 nafarga yaqin o'g'il va qizlar o'zaro kuch sinashdi.

Yakuniy sarhisoblarga ko'ra, katta yoshli, yani 2001-2003 yillarda tug'ilgan duatlonchilar birinchiligida Gurlan tumani o'quv sport texnika klubi azosi Zumrad O'razmetova qizlar orasida, Urganch avtomobil sport texnika maktabi sportchisi Norbek Jumaniyozov o'g'illar o'rtasida birinchi o'rinni egalladi.

Kichik, 2004-2006 yillarda tug'ilgan o'smirlar musobaqasida shovotlik Zuhra Ro'zimova va Qo'shko'pir tumanidagi “O'rtayop” o'quv-sport texnika klubi vakili Otabek Omonboev g'olib bo'ldi.

Umumjamoa hisobida Gurlan tumani jamoasi duatlonchilari shohsupaning birinchi pog'onasiga ko'tarildi.

Ikrom XUDOYBERGANOV, Xorazm viloyatidan