"Uzchess Cup". 4-turdan so'ng "Masters" va "Futures" guruhlarida shaxmatchilarimiz yakka peshqadam!

Mukofot jamg'armasi 166 000 AQSH dollarini tashkil etuvchi musobaqada bugun 4-tur uchrashuvlari o'tkazildi. Qizig'i, turnirning "Masters" va "Futures" guruhlarida o'zbekistonlik shaxmatchilar yakka peshqadam bo'lib olishdi. 

Bugun istedodli grossmeysterimiz Nodirbek Yakubboev (2634) Eronning birinchi raqamli shaxmatchisi, "Uzchess Cup" turnirida uchinchi raqam ostida tasniflangan Parham Maqsudluni taslim etdi va "Masters" guruhida 3 ochko bilan yakka peshqadam bo'lib oldi. Xitoylik YU Yang Yi (2715) hamda bu turda Nodirbek Abdusattorovdan ustun kelgan Javohir Sindarov (2668) 2,5 ochko bilan ikkinchi va uchinchi o'rinlarni band etishgan. Richchard Rapport, Nodirbek Abdusattorov va Aleksey Sarana hisobida 2 ochkodan bor. 

"Challengers" guruhida 4-turdan so'ng serbiyalik Aleksandar Indjich 3 ochko bilan yakka karvonboshilik qilyapti. Hamyurtimiz SHamsiddin Vohidov bu turda turkiyalik Mustafa Yilmaz bilan durang o'ynadi. U 2,5 ochko bilan ikkinchi o'rinni band etgan. Jahongir Vohidov 2 ochko bilan qo'shimcha ko'rsatkichlarga ko'ra kuchli uchlikka yakun yasab bergan. Mustafo Yilmaz, Maksim Matlakov, Aleksandr Donchenko va Abhijit Gupta hisobida ham 2 tadan ochko bor. 

Va nihoyat, "Futures" guruhida 4-turdan so'ng o'zbekistonlik uch nafar shaxmatchi kuchli uchlikdan joy olib turibdi. Ketma-ket uchinchi g'alabasini qo'lga kiritgan Muhammadzohid Suyarov (2430) 3,5 ochko bilan yakka peshqadamlikni qo'lga oldi. Muhiddin Madaminov va Saidakbar Saydaliev hisobida 2,5 tadan ochko bor. Bugun Humoyun Begmuratovni taslim etgan eronlik Bardiya Daneshvar ham o'z ochkolarini 2,5 taga etkazib oldi.