UzChess Cup. Abdusattorov asosiy raqibi bilan o'ynadi, Sindarovda kutilmagan natija, 4-turning barcha natijalari bitta xabarda

Ikkinchi bor tashkil etilayotgan UzChess Cup turniri Masters, Challengers va Futures guruhlarida o'tkazilmoqda. Kuchlilar jam bo'lgan Masters guruhida rossiyalik jahon chempioni Yan Nepomnyashiy, hindistonlik taniqli grossmeysterlar Aravindh CHitambaram, Rameshbabu Pragnanandha, Arjun Ergaisi, eronlik Parham Maqsudlu, vengriyalik Richard Rapport, o'zimizning grossmeysterlar Nodirbek Abdusattorov, Javohir Sindarov, Nodirbek Yakubboev va SHamsiddin Vohidov o'zaro bahs olib boryapti. 

FIDE Circiut uchun qimmatli reyting ochkolari o'ynalayotgan ushbu xalqaro turnirning 4-turida Nodirbek Abdusattorov qora donalarda asosiy raqiblaridan biri, hindistonlik grossmeyster Arjun Ergaisi bilan durang o'ynadi. Javohir Sindarov esa biroz kutilmaganda yana bir hind shaxmatchisi Rameshbabu Praggnanandhaga yutqazib qo'ydi. Nodirbek Yakubboev ham bu turda mag'lubiyat alamini totib ko'rdi. U eronlik Parham Maqsudluga imkoniyatni boy berdi. SHamsiddin Vohidov bu turda qora donalarda vengriyalik Richard Rapport bilan murosaga keldi. 

Turnirning Challengers guruhida ishtirok etayotgan Gulruhbegim Tohirjonova qora donalarda xitoylik Ma Kun bilan durangga erishdi. Muhiddin Madaminov peshqadamlik uchun kechgan bahsda greciyalik Nikolas Teodorouga yutqazdi. Jahongir Vohidov ukrainalik shaxmat afsonasi Vasiliy Ivanchukni mag'lub etishni uddaladi. Yosh shaxmatchimiz Muhammadzohid Suyarov Vitaliy Sivuk bilan ochkolarni bo'lishib oldi. 

Futures guruhining 4-turida Saidakbar Saydaliev oq donalarda Alan Pichotni taslim etdi. Humoyun Begmuratov Klementi Sichyov bilan durang qayd etdi. Grossmeysterimiz Ortiq Nig'matov g'alabali seriyasini davom ettirdi. Bu safar u Robert Rakdan ustun keldi. Abdimalik Abdisalimov Boris CHatalbashevga yutqazib qo'ydi.