UzChess Cup. Abdusattorovda g'alaba, 3-turning barcha natijalari bitta xabarda + FOTO

Ikkinchi bor tashkil etilayotgan UzChess Cup turniri Masters, Challengers va Futures guruhlarida o'tkazilmoqda. Kuchlilar jam bo'lgan Masters guruhida rossiyalik jahon chempioni Yan Nepomnyashiy, hindistonlik taniqli grossmeysterlar Aravindh CHitambaram, Rameshbabu Pragnanandha, Arjun Ergaisi, eronlik Parham Maqsudlu, vengriyalik Richard Rapport, o'zimizning grossmeysterlar Nodirbek Abdusattorov, Javohir Sindarov, Nodirbek Yakubboev va SHamsiddin Vohidov o'zaro bahs olib boryapti. 

FIDE Circiut uchun qimmatli reyting ochkolari o'ynalayotgan ushbu xalqaro turnirning 3-turida Nodirbek Abdusattorov oq donalarda Richard Rapportni mag'lubiyatga uchratdi. O'tgan turda Abdusattorov bilan durang o'ynagan Javohir Sindarov bu safar SHamsiddin Vohidovga qarshi kechgan o'zbek derbisida murosaga keldi. Nodirbek Yakubboev Rameshbabu Praggnanandha bilan durang qayd etdi. Jahon chempioni Yan Nepomnyashiy oq donalarda Arjun Ergaisi bilan ochkolarni bo'lishib oldi. Parham Maqsudlu - Aravindh CHitambaram partiyasida ham durang kuzatildi.  

Turnirning Challengers guruhida ishtirok etayotgan Gulruhbegim Tohirjonova oq donalarda ukrainalik shaxmat afsonasi Vasiliy Ivanchukka yutqazib qo'ydi. Jahongir Vohidov ozarbayjonlik taniqli shaxmatchi Nijat Abasov bilan durang o'ynadi. Grossmeysterimiz Muhiddin Madaminov xitoylik Ma Kunni taslim etishga muvaffaq bo'ldi. Yosh shaxmatchimiz Muhammadzohid Suyarov Hong Endryuga yutqazdi. 

Futures guruhining 3-turida ham o'zbek derbisi kuzatildi. Saidakbar Saydaliev qora donalarda o'ynab, Humoyun Begmuratovga imkoniyatni boy berdi. Grossmeysterimiz Ortiq Nig'matov qora donalarda harakat qilganiga qaramay, peshqadam turkmanistonlik Saparmirat Atabaevni mag'lubiyatga uchratdi. Abdimalik Abdisalimov oq donalarda Alan Pichotga yutqazib qo'ydi.