"Uzchess Cup". Bugun 8-turda ikkita o'zbek derbisiga guvoh bo'lamiz. Vohidovlar duelida kim g'olib bo'ladi?

Mukofot jamg'armasi 166 000 AQSH dollarini tashkil etuvchi musobaqada bugun 8-tur partiyalari o'ynaladi. Bugungi uchrashuvlar ham soat 15:00da boshlanadi. "Masters" guruhida qo'shimcha ko'rsatkichlarga ko'ra peshqadamlik qilayotgan Nodirbek Yakubboev (2634) Aleksandr Grishuk (FIDE, 2719) bilan munosabatlariga oydinlik kiritib oladi. Ikkinchi o'rinni egallab turgan Nodirbek Abdusattorov (2766) Vidit Santosh Gujrathi (Hindiston, 2721) bilan uchrashadi. Javohir Sindarov (2688) esa Aleksey Sarana (Serbiya, 2712)ga qarshi bahs olib boradi. Uchchala grossmeysterimiz ham 8-turda qora donalarda harakat qilishadi. 

"Uzchess Cup". "Masters" guruhi. 8-tur juftliklari

Aleksey Sarana (Serbiya, 2712) - Javohir Sindarov (O'zbekiston, 2668) 

Aleksandr Grishuk (FIDE, 2719) - Nodirbek Yakubboev (O'zbekiston, 2634)  

YU Yang Yi (Xitoy, 2715) - SHaxriyar Mamedyarov (Ozarbayjon, 2734) 

Richard Rapport (Ruminiya, 2715) - Parham Maqsudlu (Eron, 2733) 

Vidit Santosh Gujrathi (Hindiston, 2721) - Nodirbek Abdusattorov (O'zbekiston, 2766) 

"Challengers" guruhining 8-turida turnir jadvalida peshqadam bo'lib olgan hamyurtimiz SHamsiddin Vohidov (2624) qora donalarda yana bir grossmeysterimiz Jahongir Vohidov (2580) bilan hisob-kitob qiladi. SHamsiddin uchun juda ham muhim uchrashuv. U 7-turda guruh peshqadami bo'lib kelgan Aleksandr Indjich (Serbiya, 2602)ni taslim eta olgandi. Jahongir Vohidov esa qora donalarda o'ynaganiga qaramay, Aleksandr Donchenko (Germaniya, 2639)ni mag'lubiyatga uchratgan edi. 

"Futures" guruhida ilk mag'lubiyatini qabul qilib olganiga qaramay, 5 ochko bilan peshqadamlik qilayotgan istedodli shaxmatchimiz Muhammadzohid Suyarov (2430) 8-turda yana bir hamyurtimiz Humoyun Begmuratov (2429)ga qarshi oq donalarda o'ynaydi. Agar bugun Suyarov g'alaba qozona olsa, deyarli chempionlikni naqd qiladi. Muhiddin Madaminov (2517) bu turda eronlik Bardiya Daneshvar (2611), Saidakbar Saydaliev (2448) esa belaruslik grossmeyster Mixail Nikitenko (2525) bilan to'qnash keladi.