"Uzchess Cup". "Masters"da faqat Abdusattorov yutdi, Suyarovda ketma-ket 4-g'alaba, ikki shaxmatchimiz hamon peshqadam (Barcha malumotlar)

Mukofot jamg'armasi 166 000 AQSH dollarini tashkil etuvchi musobaqada 5-tur uchrashuvlari ortda qoldi. Turnirning "Masters" va "Futures" guruhlarida hamon o'zbekistonlik shaxmatchilar yakka peshqadam bo'lib turishibdi. 

Istedodli grossmeysterimiz Nodirbek Yakubboev (2634) qora donalarda ozarbayjonlik SHaxriyar Mamedyarov (2734) bilan durang o'ynadi. Nodirbek Abdusattorov esa oq donalarda Aleksandr Grishuk (FIDE, 2719)ni mag'lubiyatga uchratib, yana etakchilar safiga qo'shilib oldi. Bir tur oldin Abdusattorovni mag'lub etgan Javohir Sindarov esa qora donalarda Eronning birinchi raqamli shaxmatchisi, "Uzchess Cup" turnirida uchinchi raqam ostida tasniflangan Parham Maqsudlu bilan murosaga keldi. Nodirbek Abdusattorovning o'yinidan tashqari qolgan barcha partiyalarda durang qayd etildi.  

Oltinchi tur oldidan "Masters" guruhida Nodirbek Yakubboev 3,5 ochko bilan karvonboshilik qilmoqda. Javohir Sindarov, YU Yang Yi va Nodirbek Abdusattorov hisobida 3 ochkodan bor. Ikki yarim ochkoga ega Richard Rapport va Aleksey Sarana keyingi o'rinlarni band etgan.     

"Challengers" guruhining 5-turida aksincha, faqat bitta partiyada durang qayd etildi, qolgan juftliklarda esa bir tomonning g'alabasiga guvoh bo'ldik. Guruh peshqadami, serbiyalik Aleksandar Indjich bu turda qora donalarda hindistonlik Abhijit Guptani taslim etdi. Ikkinchi o'rinni egallab turgan shaxmatchimiz SHamsiddin Vohidov oq donalarda turkiyalik Aydin Suleymanlidan ustun keldi. Bu turgacha uchinchi o'rinni egallab kelgan Jahongir Vohidov esa germaniyalik Aleksandr Predkega yutqazib qo'ydi. 

"Futures" guruhida 5-turdan so'ng ketma-ket to'rtinchi g'alabasini qo'lga kiritgan Muhammadzohid Suyarov (2430) 4,5 ochko bilan yakka peshqadamligini mustahkamlab oldi. U 5-turda qora donalarda o'ynashiga qaramay, ukrainalik grossmeyster Vitaliy Bernardskini engdi. Kuchli uchlikdan joy olgan Muhiddin Madaminov qora donalarda ozarbayjonlik Vugar Rasulov bilan murosaga keldi. Saidakbar Saydaliev esa yana bir hamyurtimiz Humoyun Begmuratovni taslim etib, 3,5 ochko bilan ikkinchi o'ringa ko'tarilib oldi.