Velotrek bo'yicha Milliy terma jamoamizda evropalik murabbiy ish boshladi

Zamonaviy metodlarni o'zbek sportiga ham olib kirishda xorijlik mutaxassislarni jalb qilish eng maqbul variant desak, mubolag'a bo'lmaydi. SHu maqsadda velosport bo'yicha terma jamoamizda xorijlik mutaxassis ish boshladi.

Yanada aniqroq qilib aytadigan bo'lsak, belaruslik Sergey Volchok velotrek bo'yicha O'zbekiston terma jamoasi boshqaruviga rasman kirishdi. Mutaxassis O'zbekiston triatlon va velosiped sporti federaciyalari o'rtasida imzolangan memorandum tadbirida ommaga rasman tanishtirildi.

Sergey Volchok 1972 yil tug'ilgan. Uzoq yillar davomida Belarus terma jamoasida murabbiylik qilgan va shu paytgacha 5 ta jahon chempioni, ko'p karra Olimpiya o'yinlari ishtirokchilari, qita chempionati g'olib va sovrindorlarini tarbiyalagan. Mutaxassis bilan 1 yilga shartnoma imzolangan bo'lib, bu vaqt orasida jamoamiz qatnashadigan musobaqalar, jumladan Osiyo chempionati va kubogi bosqichlari, Turkiyada o'tadigan Islom birdamligi o'yinlariga sportchilarni munosib tayyorlash, imkon qadar ko'p miqdorda sovrinli o'rinlarni egallash kabi vazifalar qo'yilgan.

Murabbiy asosan trekning sprint yo'nalishiga ixtisoslashganini alohida aytib o'tish mumkin. Hozirda u poytaxtimizda tashkil etilayotgan yoshlar va kattalar o'rtasidagi mamlakat birinchiligini diqqat bilan kuzatib bormoqda.