WR Chess Masters. Abdusattorovdan kambek, 1/4 finalda o'zbek derbisini ko'rmaymiz

Mukofot jamg'armasi 58 000 evroni tashkil qiluvchi WR Chess Masters turnirida dunyoning kuchli 16 nafar grossmeysteri bosh sovrin uchun bahslarga kirishdi. Ular orasida yosh grossmeysterlarimiz Nodirbek Abdusattorov va Javohir Sindarovning ham borligi haqida xabar bergan edik.

Afsuski, Javohir Sindarov ilk davrada franciyalik Maksim Vashe-Lagravga imkoniyatni boy berib qo'ydi. Asosiy ikki partiyada tomonlar murosaga kelishdi. G'olib nomini aniqlab bergan armageddon partiyasida esa francuz shaxmatchisining qo'li baland keldi. 

Nodirbek Abdusattorov esa turnirdagi yagona ayol shaxmatchi, SHveycariya sharafini himoya qilayotgan 12-Jahon chempioni Aleksandra Kostenyukka qarshi bahs olib bordi. Birinchi partiyada Nodirbek katta ustunlikka ega bo'lsa-da, yakunda yutqazib qo'ydi. Ikkinchi partiyada u xatosini to'g'riladi va g'alabaga erishdi. Bu juftlikda ham g'olib nomini qo'shimcha armageddon partiyasi aniqlab berdi. Unda qora donalarda durang qayd etgani uchun Abdusattorov 1/4 finalga chiqdi. 

Etiborlisi, agar Javohir Sindarov ham g'alaba qozonganida, biz musobaqaning 1/4 final bosqichida o'zbek derbisiga guvoh bo'lar edik. Bugun Nodirbek chorak finalda Javohir uchun ham revansh olishga urinib ko'radi.