WR Chess Masters. Abdusattorovning 1/4 finaldagi taqdiri yana tay-brekda hal bo'ldi

Mukofot jamg'armasi 58 000 evroni tashkil qiluvchi WR Chess Masters turnirida dunyoning kuchli 16 nafar grossmeysteri bosh sovrin uchun bahslarga kirishgandi. Ular orasida yosh grossmeysterlarimiz Nodirbek Abdusattorov va Javohir Sindarovning ham borligi haqida xabar bergan edik.

Sindarov ilk davrada franciyalik Maksim Vashe-Lagravga imkoniyatni boy berib qo'ygan bo'lsa, Abdusattorov turnirdagi yagona ayol shaxmatchi, SHveycariya sharafini himoya qilayotgan 12-Jahon chempioni Aleksandra Kostenyukni tay-brekda, aniqrog'i qo'shimcha armageddon partiyasida taslim etdi. 

Afsuski, Nodirbek 1/4 finalda Javohir uchun revansh ola bilmadi. U Maksim Vashe-Lagravga aynan armageddon partiyasida yutqazib qo'ydi. SHaxmatchilar o'rtasidagi dastlabki ikki partiyada tomonlar durangga imzo chekishgandi. 

SHu tariqa, Javohir Sindarovdan keyin Nodirbek Abdusattorov ham musobaqadagi ishtirokini yakunladi. Javohir WR Chess Masters turniridagi ishtirokidagi 1000, Nodirbek esa 2500 evro pul mukofoti ishlab oldi.