Xokkey. O'zbekiston U-18 terma jamoasi o'z divizionida chempion bo'ldi va yuqori ligaga yo'l oldi

28 fevral - 6 mart kunlari Tailand poytaxti Bangkok shahrida bo'lib o'tgan turnirda yigitlarimiz ilk urinishdayoq yuqoriroq divizionga ko'tarilishdi. Vakillarimiz kelasi mavsumda U-18 Jahon CHempionatida III divizionning A guruhida ishtirok etishadi.

O'zbekiston terma jamoasi guruhdagi barcha o'yinlarda g'alaba qozondi: Janubiy Afrika Respublikasi (12:0), Lyuksemburg (12:1), Turkmaniston (8:2) va Bosniya va Gercegovina (11:3). Nihoyat, 6 mart kuni hal qiluvchi bahsda Tailand jamoasi ustidan 3:2 hisobida qiyin g'alabaga erishildi. 

O'tgan yili bizning yigitlar Tailand terma jamoasi bilan Osiyo va Okeaniya Kubogida (Toshkent va Samarqand, aprel 2024) ikki bor to'qnash kelishgan edi. O'shanda O'zbekiston chempion bo'lib, guruh bosqichida tailandliklarni 7:5 hisobida, finalda esa 2:1 hisobida enggan edi. Bu safar jahon chempionatida kurash yana ham keskin kechdi. G'alaba keltirgan shaybani uchrashuv tugashiga 5 daqiqa qolganida Jamoamizning eng yaxshi bombardirlaridan biri – Jasurbek Rustamxonov kiritdi.

Jamoa sardori Rustamxonov 5 o'yinda 22 ochko (14 gol + 8 assist) jamg'arib, turnirning eng yaxshi o'yinchisi deb topildi. Jasur, shuningdek, yosh yulduz Salohiddin Azimov o'tgan mavsumni CHexiyada o'tkazdi. Qolgan yigitlar esa Qozog'iston yoshlar ligasida "Tashkent Select" jamoasi safida o'ynashdi.

O'zbekistonning ushbu terma jamoasi Toshkentning ikkita klubi – "Humo" va "Binokor" tarbiyalanuvchilaridan iborat. Ular 2018 yilda tashkil etilgan O'zbekiston Xokkey Federaciyasining muvaffaqiyatli faoliyatining natijasidir. Bugun ular O'XFning faxri!

CHempionlarimizni tayyorlagan murabbiylar shtabini alohida tilga olish lozim – Normunds Seeys, Abdumajid Nosirov va Roman Krivomazovga tashakkur!

Aprel oyida O'zbekiston milliy terma jamoasi ham jahon chempionatida o'z debyutini o'tkazadi. Ular IV divizionda Armanistonda o'tadigan musobaqada qatnashishadi. Tarkib tajribali o'yinchilardan iborat bo'lsa-da, asosiy kuch bugun Bangkokda Jahon Kubogini ko'tarib turgan yigitlar bo'ladi.