Xorazm viloyati jismoniy tarbiya va sport boshqarmasiga yangi rahbar tayinlandi

O'zbekiston Respublikasi Jismoniy tarbiya va sport vazirining tegishli buyrug'i bilan, shu kungacha Urganch shahar yakka kurash sport turlariga ixtisoslashtirilgan bolalar-o'smirlar sport maktabi direktori lavozimida faoliyat yuritib kelgan Polvonov Ortiq Maqsudbekovich Xorazm viloyati jismoniy tarbiya va sport boshqarmasi boshlig'i vazifasini vaqtincha bajaruvchi etib tayinlandi.

Ortiq Polvonov 1980 yil 19 noyabr kuni Urganch shahrida tug'ilgan. Malumoti oliy. 2006 yili Urganch davlat universitetining jismoniy tarbiya va jismoniy madaniyat fakultetini (sirtqi) tugatgan. Oilali, uch nafar farzandning mehribon otasi.

Mehnat faoliyatini 2005 yili Urganch shahar hokimligi madaniyat va sport ishlari bo'limi ommaviy sportni rivojlantirish va sport tadbirlarini tashkil etish bo'yicha bosh inspektori lavozimida boshlagan.

2006-2013 yillar mobaynida Xorazm viloyati hokimligi madaniyat va sport ishlari boshqarmasi tasarrufidagi 3-sonli bolalar-o'smirlar sport maktabi direktori, so'ngra Xorazm viloyati 2-sonli Olimpiya zaxiralari ixtisoslashtirilgan bolalar va o'smirlar sport maktabi direktori bo'lib ishlagan.

2016 yildan shu kungacha Xorazm viloyati yakka kurash sport turlariga ixtisoslashtirilgan bolalar-o'smirlar sport maktabi direktori lavozimida mehnat qilib kelayotgan edi.

Jismoniy tarbiya va sport vazirligi Ortiq Polvonovga masuliyatli lavozimda omad tilaydi.