Xorazmda “Sport oyligi” davom etmoqda

Tashabbusning ikkinchisi yoshlarni jismoniy tarbiya va sportga kengroq jalb etishga, sport inshootlari quvvatini oshirishga, undan unumli va maqsadli foydalanishga qaratilgan edi.

Xorazm viloyatida ushbu tashabbusni hayotga tadbiq etish barobarida, Vazirlar Mahkamasining 2019 yil 15 apreldagi “2019 yil may oyining “Sport oyligi” deb elon qilinishi hamda sport tadbirlarini o'tkazish to'g'risida”gi yig'ilishi bayoni ijrosini taminlash maqsadida ko'plab tadbirlar uyushtirilmoqda.

Joriy yilning 4 may kuni ertalabdan Urganch shahridagi muhtasham “Yoshlik” sport majmuasi har qachongidan ham sportsevar hamyurtlarimiz bilan gavjum bo'ldi. SHu kuni bo'lib o'tadigan navbatdagi tadbirlar badantarbiya mashg'ulotlari bilan boshlandi. Bu erda viloyat markazidagi umumtalim maktablarining jismoniy tarbiya fani o'qituvchilari, bolalar-o'smirlar sport maktablari direktor va murabbiylari badantarbiya mashqlarini o'tkazishdi.

- Sport oyligi doirasidagi tadbirlarga aholining keng qatlami, xususan, turli yosh toifasidagi o'g'il-qizlar, ota-onalar, boshqa sohalarda mehnat qilayotgan ishchi-xodimlar jalb qilinmoqda. Zero, “Sog'lom tanda-sog'lom aql” deb bejizga aytmagan dono xalqimiz. Umuman olganda, uyushtirilayotgan tadbirlarimiz bayramona tarzda o'tayotganligi bilan ishtirokchilarga ko'tarinki ruh, xush kayfiyat bag'ishlayapti, - deydi Xorazm viloyati jismoniy tarbiya va sport boshqarmasi bo'lim boshlig'i Oybek Kamolov.

Etiborlisi shundaki, badantarbiya mashg'ulotlari “Sport-mustahkam oilamiz poydevori” shiori ostida respublika miqyosida tashkil etilayotgan oilaviy sport musobaqasining viloyat bosqichiga ulanib ketdi. Qiziqarli kechgan bellashuvlar yakunida g'olib va sovrindor bo'lgan oilaviy jamoalar taqdirlanishdi. Majmua stadionida engil atletika va futbol bo'yicha tashkil etilgan musobaqalar ham tomoshabinlarda katta qiziqish uyg'otdi. SHuningdek, O'zbekiston mudofaasiga ko'maklashuvchi “Vatanparvar” tashkiloti Xorazm viloyat texnik va amaliy sport turlari markazida yoshlar o'rtasida uyushtirilgan pnevmatik quroldan o'q otish bo'yicha viloyat birinchiligi ham “Sport oyligi”ga o'zgacha fayz va tarovat bag'ishladi.

- Ayni damda, yurtimizda sportimiz rivoji, yoshlarimiz kelajagi yo'lida ibratli ishlar amalga oshirilmoqda. Tabiiyki, ushbu islohatlar barchani birdek mamnun etayotir. “Sport oyligi”ning tashkil etilishi ham ezgu maqsadlarimiz yo'lida xizmat qilyapti. Ishonchim komilki, o'g'il-qizlarimiz hukumatimiz tomonidan ko'rsatilayotgan g'amxo'rlik va etiborga javoban, vatanimizga sadoqatli, el-yurtimizga mehr-muruvvatli insonlar bo'lib voyaga etishadi,-deydi Urganch shahridagi 6-son umumtalim maktabining jismoniy tarbiya fani o'qituvchisi Rayhon Xudoyberganova.

“Sport oyligi” doirasidagi keng qamrovli tadbirlar har kuni Xorazm vohasining barcha shahar va tumanlarida davom etmoqda.

Ikrom XUDOYBERGANOV.