Yaponiyaning O'zbekistondagi yangi favqulodda va muxtor elchisi Milliy olimpiya qo'mitasiga tashrif buyurdi

Ikki davlat o'rtasida sport sohasidagi aloqalarni yanada mustahkamlash maqsadida ayni kunlarda yurtimizda yapon sport haftaligi o'tkazilmoqda. Yaqinlashib kelayotgan Tokio Olimpiadasiga yanada puxta tayyorgarlik ko'rish, sportchilarimizning Olimpiya o'yinlaridan avval ushbu mamlakat iqlimi va oziq-ovqatlariga moslashib olishi uchun Yaponiyaning turli shaharlarida o'quv-mashg'ulot yig'inlarini tashkil qilish kabi masalalar O'zbekiston Milliy olimpiya qo'mitasi oldida turgan asosiy vazifalardandir. SHubhasiz, bunday echimlarni Yaponiyaning O'zbekistondagi elchixonasi ko'magisiz hal qilish amri mahol. SHu va boshqa masalalarni muhokama qilish yuzasidan Yaponiyaning O'zbekistondagi yangi favqulodda va muxtor elchisi Yoshinori Fujiyama Milliy olimpiya qo'mitasiga tashrif buyurdi. Mehmonni MOQ prezidenti Rustam SHoabdurahmonov qarshi oldi. 

“Avvalambor, xush kelibsiz. Boshlagan yangi missiyangizda kattadan katta muvaffaqiyatlar tilab qolaman. Davlatlarimizning har tomonlama olib borayotgan chuqur do'stona aloqalarini sport sohasida ham yanada mustahkamlashishidan umidvorman. Muhtaram Prezidentimiz yurtimizni yanada rivojlantirishda 5 muhim tashabbuslardan birini jismoniy tarbiya va sport bilan bog'lagan. Zero, yoshlarimizning sport bilan mashg'ul bo'lishlari kelajagimiz uchun muhimdir. Ayni paytda Tokio-2020ga tayyorgarlik bo'yicha ishchi guruhimiz Tokioda bo'lib turibdi. Ular ushbu tashrif davomida kelasi yil Olimpiya o'yinlari payti o'tishi rejalashtirilgan “O'zbekiston kunlari”ning tashkiliy ishlari bo'yicha yuzaga keladigan masalalarni o'rganib kelishadi. Bir so'z bilan aytganda, O'zbekistonda Tokio Olimpiadasiga juda katta tayyorgarlik ishlari olib borilmoqda. Yanada samarali faoliyat olib borishimiz uchun sizning qo'llab-quvvatlashingiz va yordamingiz biz uchun juda muhim”, – dedi Rustam SHoabdurahmonov. 

Muhtaram elchi ham tashrif davomida olib borilayotgan hamkorlik ishlarining yanada mustahkamlanishi borasidagi o'z fikrlarini bildirib o'tdi.  

“O'zbekistonda faoliyat boshlaganimga uncha ko'p bo'lmadi. Darhaqiqat, davlatlarimiz do'stona aloqalarni har tomonlama chuqur olib bormoqda. Vazifamni bajarishga kirishishdan avval o'zbek va yapon xalqining sport sohasidagi aloqasi bunchalik mustahkam deb o'ylamagan edim. O'z navbatida, men ham bunday do'stona aloqalarni yanada mustahkamlashdan umidvorman. Yaqin orada dzyudo bo'yicha yaponiyalik kuchli mutaxassislardan biri O'zbekistonda faoliyat olib bora boshlaydi va o'zbekistonlik dzyudochilarni Tokio Olimpiadasiga qadar tayyorlash davrida xizmat qiladi. Ochig'i, Olimpiya o'yinlari vaqtida o'zbek va yapon sportchilarining o'zaro to'qnash kelib qolishini xohlamayman. O'zbekistonlik atletlar har bir sportda jiddiy raqibdir”, – dedi Yoshinori Fujiyama. 

MOQ rahbari va muhtaram elchi suhbat davomida qator istiqbolli dasturlar va rejalar, o'zaro hamkorlikda faoliyat olib borish bo'yicha ijobiy kelishuvga erishishdi.