Yosh shaxmatchilarimiz Xitoyda o'tgan Osiyo chempionatida 18 medalni qo'lga kiritdi

Nufuzli musobaqaning standart shaxmat bo'yicha 11 yoshgacha qizlar o'rtasidagi bahslarida Umida Omonova 8 ochko bilan birinchi o'rinni egallab, Osiyo chempioni bo'ldi. U blic shaxmat bo'yicha o'tkazilgan bahslarda ham 8 ochko bilan oltin medalni qo'lga kiritib, rapid yo'nalishida 5,5 ochko jamg'argan holda kumush medal bilan taqdirlandi.

Ushbu yosh toifasidagi o'g'il bolalar bahsida Olmos Rahmatullaev 7,5 ochko bilan ikkinchi o'rinni egalladi. Rapid va blic yo'nalishlarida esa tengsiz ekanini isbotlab, shohsupaning eng yuqori pog'onasiga ko'tarildi.

Etti yoshgacha qizlar bahsida qatnashgan Afro'zabonu Ro'zimatova 7 ochko bilan kumush medalni qo'lga kiritdi. Uning blic yo'nalishidagi ishtiroki esa g'alaba bilan yakunlandi – 7 ochko va oltin medal. Rapid yo'nalishida 5,5 ochko bilan ikkinchi bo'ldi.

O'n besh yoshgacha qizlar musobaqasida Sitora Saparova standart shaxmat bo'yicha uchinchi o'rinni egalladi. Blic yo'nalishida 9 imkoniyatdan 9 ochko, rapid yo'nalishida etti imkoniyatdan 6,5 ochko jamg'arib, shohsupaning eng yuqori pog'onasida ko'tarildi.

O'n uch yoshgacha qizlar bahsida yana bir shaxmatchimiz Yuliya Xegay har uch yo'nalishda muvaffaqiyatli ishtirok etib, ikkita kumush va bitta bronza medalni qo'lga kiritgan bo'lsa, 9 yoshgacha qizlar o'rtasida Zilola Aktamova blic yo'nalishda 8,5 ochko bilan birinchi, rapid yo'nalishda 5 ochko bilan uchinchi o'rinni egalladi.

O'n uch yoshgacha o'g'il bolalar o'rtasida Mirfayz Sunnatov blic yo'nalishida 6,5 ochko jamg'arib, chempionatning bronza medali bilan taqdirlandi.

Bayram Aytmurodov, O'zA