25 may 11:38
Yangiliklar

O'q otish, Engil atletika

Yozgi biatlonchilarning sarasi aniqlandi + FOTO

Urganch tumanining CHolish qo'rg'onida joylashgan o'quv-mashg'ulot maydonida 2003 yilda tug'ilgan va undan kichik yoshdagi o'smirlar o'rtasida yozgi biatlon bo'yicha Xorazm viloyati chempionati o'tkazildi.

“Men g'olib!” shiori ostida uyushtirilgan mazkur musobaqada O'zbekiston respublikasi Mudofaasiga ko'maklashuvchi “Vatanparvar” tashkiloti Xorazm viloyati kengashi tizimidagi tashkilotlarning sport sekciyalari tarbiyalanuvchilaridan tashkil topgan 17 ta jamoaning 37 nafar yozgi biatlonchisi o'z mahoratini namoyish etdi.

Yakuniy sarhisoblarga ko'ra, qizlar birinchiligida Bog'ot tumani o'quv sport texnika klubi azosi Sarvinoz Sultonboeva viloyat chempionligini qo'lga kiritgan bo'lsa, Surayyo Komilova (Bog'ot tumani O'STK) va Ziyoda Jumamuratova (Qo'shko'pir tumani O'STK) mos ravishda ikkinchi va uchinchi o'rinni egallashdi.

O'g'illar orasida Qo'shko'pir tumanidagi “O'rtayop” o'quv sport texnika klubi sportchisi Diyorbek Rajabov zafar quchdi. SHuningdek, qo'shko'pirlik Alimardon Umarjonov va shovotlik Mirzabek Qadamboev sovrindor bo'lishdi.

Umumjamoa hisobida kuchli uchlik quyidagicha ko'rinish oldi:

1-o'rin. “O'rtayop” O'STK. 2-o'rin. Bog'ot tumani O'STK. 3-o'rin. Qo'shko'pir tumani O'STK.

Musobaqaning yopilish marosimida qatnashgan O'zbekiston respublikasi Mudofaasiga ko'maklashuvchi “Vatanparvar” tashkiloti viloyat texnik va amaliy sport turlari markazi direktori Odilbek Ibragimov g'olib va sovrindorni qutlab, ularni diplom va sovg'alar bilan taqdirladi.

Endilikda, eng yaxshi xorazmlik yosh yozgi biatlonchilar 25-29 may kunlari CHirchiq shahrida S.V.Nichipurenko xotirasiga bag'ishlab o'tkaziladigan O'zbekiston chempionatida voha sharafini himoya qiladilar.