Osiyo chempionati. Jasmina oltin, Dilfuza va Azoda bronza medali uchun gilamga chiqadi

Qita chempionatida ayollar kurashi vakilalari bahslarga kirishishdi. Bugun beshta vazn toifasida g'olib va sovrindorlar nomi malum bo'ladi. Hozircha final bellashuvlarida uch nafar kurashchi-qizimizning gilamga chiqishi malum bo'lib ulgurdi. 

Quvonarlisi, 50 kg vaznda yurtimiz sharafini himoya qilayotgan Jasmina Immaeva Osiyo chempionatining oltin medali uchun qozog'istonlik Valentina Islamovaga qarshi gilamga chiqadi. Jasmina finalga qadar koreyalik Kim Jinni 4-2, taypeylik Lin Yung Xsunni 6-0, 1/2 finalda hindistonlik Sima Simani 3-2 hisobida mag'lubiyatga uchratdi. 

59 kg vazndagi kurashchimiz Dilfuza Aymbetova bronza medali uchun qirg'izistonlik Nurayda Anarkulova, 68 kilogrammda esa Azoda Esbergenova koreyalik Jeong Sunga qarshi bahs olib boradi.