05 sen 08:54
Yangiliklar

Qishki sport turlari

Ajoyib start! Figurali uchuvchilarimiz Geynish va CHigirev AQSHdagi musobaqada bronza medallariga ega chiqishdi

Figurali uchish bo'yicha O'zbekiston terma jamoasi azolari Ekaterina Geynish hamda Dmitriy CHigirev yangi mavsumdagi ilk xalqaro musobaqasida ishtirok etdi.

Ular AQSHning Nyu-York shahrida tashkil etilgan "CHellenjer" turkumidagi "John Nicks Pairs Challenge International" juftlik musobaqasida chiqish qildi.

Dastlab, kecha tongda qisqa dastur o'tkazildi. Unda Geynish va CHigirev 64.62 ball bilan ikkinchi o'rinni egallashdi. Tunda o'tkazilgan erkin dasturda esa sportchilarimiz 112.34 ball jamrag'ib, beshinchi natijani qayd etishdi.

Ahamiyatlisi, umumiy jadvalda Ekaterina va Dmitriyning ochkolari soni 176.96 ni tashkil etib, hamyurtlarimiz musobaqada uchinchi o'rinni egallashdi. Musobaqa g'olibligi amerikaliklar Elli Kem va Denni O'SHiga (191.62) nasib etdi. Ikkinchi o'rinni esa asli rossiyalik bo'lib, AQSH sharafini himoya qilayotgan juftlik — Alisa Efimova hamda Misha Mitrofanov egalladi (188.88).

"John Nicks Pairs Challenge International" musobaqasida 9 ta davlatning jami 15 juftligi ishtirok etdi. Bu juftlik dasturida ishtirok etadigan figurali uchuvchilarning joriy mavsum hisobidan ilk turniri bo'ldi.

Endilikda Geynish va CHigirev 19-21 sentyabr kunlari Germaniyaning Oberstdorf shahrida o'tkaziladigan "Nebelhorn Trophy" musobaqasida g'oliblik uchun kurash olib boradi.