Arina Sobolenko Qatarda tengsiz bo'ldi

Dunyoning 13-raketkasi Qatar Total Open final uchrashuvida reytingda o'zidan ikki pog'ona yuqorida turgan chexiyalik Petra Kvitovani ikki setda ham bir xil hisobda mag'lubiyatga uchratdi - 6/3, 6/3. Bir soatu 14 daqiqa davom etgan bahsda Arina 7, Petra esa 2 ta eys zarbasini amalga oshirdi. Ikki tennischining o'zaro uchrashuvlaridagi hisob muvozanati tiklandi - 2:2. 

Belaruslik tennischi mavsumdagi birinchi, faoliyatidagi oltinchi titulini qo'lga kiritdi. Qatardagi muvaffaqiyatli ishtirok Sobolenkoga 605,000 AQSH dollari hamda 900 reyting ochkosini taqdim etdi. Kvitova esa 304,005 dollar va 585 ochkoga ega bo'ldi.