Atletlarimiz bodibilding, fitnes va mas-restling bo'yicha Osiyo chempionatidan qaytishdi

Unda qitamizning 38 ta davlatidan 250 nafarga yaqin atlet g'oliblik uchun bahs olib borishdi.

Ushbu musobaqada Xitoy, Janubiy Koreya, Yaponiya, Indoneziya, Filippin, Malayziya, Xitoy Taypeyi, Hindiston, Pokiston, Tailand, Singapur, SHri-Lanka singari Osiyoning etakchi davlatlaridan kelgan sportchilar medallar uchun kurashga kirishdi.

Osiyo chempionatining yakuniy natijalariga ko'ra O'zbekiston terma jamoasi azolari ikkitadan oltin va bronza, jami 4 ta medalga sazovor bo'ldi. Jumladan, erkaklar o'rtasida Doston Hasanov atlet yo'nalishida oltin, Pavel Umurzakov esa bodibilding yo'nalishida bronza medalini qo'lga kiritgan bo'lsa, ayollar o'rtasidagi bahslarda Rushana Maksumova fitnes model yo'nalishida oltin, yana bir vakilamiz Anjelina Osipyan esa fitnes model yo'nalishida bronza medalini qo'lga kiritdi.

Norasmiy umumjamoa hisobida vakillarimiz bodibilding, fitnes va mas-restling yo'nalishida 38 ta davlat orasida faxrli 3-o'rinni egalladi. Bu borada Tailand eng yaxshi natija ko'rsatgan bo'lsa, ikkinchi pog'onadan mo'g'ulistonlik atletlar joy olishdi.

Hozirgina O'zbekiston sport delegaciyasi Kuala-Lumpur – Toshkent yo'nalishi bo'ylab yurtimizga etib keldi va Islom Karimov nomidagi Toshkent xalqaro aeroportiga kelib qo'ndi. Mazkur Osiyo chempionatida jami 9 nafar atletimiz O'zbekiston sharafini himoya qilishgan bo'lsa, shulardan to'rttasi yakunda sovrindorga aylanishdi.

Toshkent xalqaro aeroportida atletlarimizni Jismoniy tarbiya va sport vazirining birinchi o'rinbosari Oybek Kasimov, O'zbekiston bodibilding, fitnes va mas-restling federaciyasi raisi Odil Abdurahmonov, vazirlik hamda federaciya xodimlari, shuningdek sportchilarning oila azolari va ommaviy axborot vositalari xodimlari tantanali kutib olishdi.

Doston Hasanov (Osiyo chempioni) – Albatta, qita chempionatida g'alaba qozonishning o'zi bo'lmadi. Ammo, mashg'ulotlardagi mashaqqatli mehnatlarimiz besamar ketmadi, yurtimizga yorug' yuz bilan qaytdik. Muvaffaqiyatlarimiz zamirida O'zbekistonda jismoniy tarbiya va sportni rivojlantirishga hukumatimiz darajasida berilayotgan etibor yotibdi, desam aslo mubolag'a bo'lmaydi. Fursatdan foydalanib, kamtarona mehnatlarimizni yuksak darajada qadrlab, tantanali tarzda kutib olishgani uchun vazirlik hamda federaciya rahbariyatiga minnatdorlik bildiraman.