ATP reytingi. CHempion Jokovich 7-o'ringa tushib ketdi, Nadal esa ko'tarildi

Etiborga molik jihati shundaki, kecha "Uimbldon" chempioni bo'lgan Novak Jokovich 3-o'rindan 7-pog'onaga tushib ketdi. Londondagi "Katta Dubulg'a" turnirida ochkolar o'ynalmaganini, tennischilarga faqat mukofot pullari taqdim etilganini etirof etish o'rinli bo'ladi. 

Aksincha, ispaniyalik Rafael Nadal dunyoning uchinchi raketkasiga aylanib oldi. U ikki hafta avvalgi reytingda 4-o'rinda qayd etilgandi. ATP reytingini hamon Daniil Medvedev boshqarib turibdi. Medvelev Rossiya va Belarus tennischilariga qo'yilgan taqiq sabab "Uimbldon"da ishtirok etmadi.   

Tajribali tennischimiz Denis Istomin quyiga sho'ng'ishda davom etmoqda. U bugun yangilangan reytingda 72 pog'onaga pastlab, 453-o'rinni egallab turibdi. Denis endi O'zbekistonning uchinchi raketkasi. Birinchi raketkamiz Humoyun Sultonov 3 pog'onaga yuqorilab, 394-o'rinni band etgan. Sergey Fomin 408-pog'onadan joy olgan va u endi ikkinchi raketkamiz. Top-1000`talikdan yana bir tennischimiz Sanjar Fayziev (720) o'rin olgan.    

ATP reytingi. 11 iyul kungi holat

1. (1) Daniil Medvedev (Rossiya) - 7775 ochko

2. (2) Aleksandr Zverev (Germaniya) - 6850

3. (4) Rafael Nadal (Ispaniya) - 6165

4. (5) Stefanos Cicipas (Greciya) - 5150

5. (6) Kasper Ruud (Norvegiya) - 5050

6. (7) Karlos Alkaraz (Ispaniya) - 4845

7. (3) Novak Jokovich (Serbiya) - 4770

8. (8) Andrey Rublyov (Rossiya) - 3700

9. (9) Feliks Oje (Kanada) - 3445

10. (13) Yannik Sinner (Italiya) - 3185