Belbog'li kurash. Yil Xorazm polvonlari uchun yutuqlarga boy yil bo'ldi

Xususan, Xorazm viloyatida ham. Bugun mazkur milliy sport turi bilan viloyatning Gurlan, Qo'shko'pir, SHovot, Urganch, Yangibozor kabi bir qator tumanlarida besh yuzdan ortiq o'g'il-qizlarning shug'ullanayotganiga guvoh bo'lish mumkin.

Malumotlarga ko'ra,  yildan yilga belbog'li kurash bilan shug'ullanuvchilar soni ortib, ularning musobaqalardagi natijalari ham tahsinga sazovor bo'lmoqda. Bu haqida viloyat belbog'li kurash federaciyasi ijrochi direktori va bosh murabbiyi Bekbergan Boltaev shunday deydi, - Tarixi uzoq o'tmishga borib taqaladigan belbog'li kurashga bizning viloyatda ham qiziqish yuqori. Ota-bobolarimizdan meros bo'lgan milliy sport turimiz bilan bugun oshno bo'lgan shogirdlarimiz  mashg'ulotlarga zo'r berib, o'tkazilayotgan milliy va xalqaro musobaqalarda munosib ishtirok etib kelishmoqda. Birgina joriy yildagi natijalarni sarihisob qiladigan bo'lsak, sportchilarimiz O'zbekiston chempionatlarida o'nta oltin, sakkizta kumush, o'n ikkita bronza medallariga ega bo'lishdi. 8-10 avgust kunlari Olmaliq shahrida o'smirlar o'rtasida bo'lib o'tgan jahon chempionatida Nusrat Yuldoshev ikkinchi o'rin, Sevinchoy O'razboeva, Mashhura Qo'zieva, Mohinur Rahmonovalar uchinchi o'rinni qo'lga kiritishdi. 31 oktyabr – 5 noyabr kunlari Rossiyaning Qozon shahrida o'tkazilgan jahon chempionatida Begoyim Rahimboeva ikkinchi o'rinni egallab kumush, Ullijon Davletova uchinchi o'rinni egallab, bronza medali sohibalari bo'lishdi. 27-29 noyabr kunlari Qozog'istonning Nur-Sulton shahri mezbonlik qilgan 1999-2001 yillarda tug'ilgan o'g'il bolalar va qizlar o'rtasidagi jahon chempionatida ham yangibozorlik shogirdlarimizdan SHoira Qalandarova uchinchi o'rinni band etib, bronza medalini o'zini qilgan bo'lsa, Munisa Rahimova kuchli beshlikda etirof etildi. Albatta, shu o'rinda belbog'ni kurashni viloyatimizda rivojlanishida, polvonlarimizning xalqaro musobaqalarda ishtirokini taminlashda yaqindan kumakchi va homiylik qilib kelayotgan O'zbekiston belbog'li kurash federaciyasiga, viloyat jismoniy tarbiya va sport boshqarmasiga, viloyat transport boshqarmasiga va ushbu boshqarmaning rahbari Rahmatullo Babaevga, “Adolat” SDPning viloyat kengashiga, Yangibozor tuman hokimligiga, qolaversa shogirdlarimizning ota-onalariga minnatdorchiligimizni bildiramiz. O'ylaymanki, tobora yaqinlashib kelayotgan 2020 yilda ham natijalarimiz bundan-da yuqori bo'ladi. Sababi, bizda buning uchun  shart-sharoitlar ham,imkoniyatlar ham etarlicha.

Ilhom RAHMONOV tayyorladi