Belbog'li kurash. Kuchlilar Farg'onada aniqlandi

Sport vazirligi hamda O'zbekiston belbog'li kurash federaciyasining taqvim-rejasiga muvofiq tashkil etilgan mazkur musobaqada mamlakatimizning turli hududlaridan 200 nafarga yaqin eng sara poovonlar  vazn toifalari bo'yicha g'oliblik uchun bahs olib borishdi.

Musobaqaning birinchi kunida erkaklar belbog'li kurashning klassik yo'nalishi bo'yicha 9 ta vazn toifasida kuch sinashgan bo'lsa, keyingi kunlarda erkaklar va ayollar erkin yo'nalishdagi bellashuvlarda ishtirok etishdi.

SHuningdek, musobaqa doirasida tantanali ochilish marosimi ham tashkil etildi. Unda Farg'ona viloyati sport boshqarmasi boshlig'i Nodirjon Hakimov hamda belbog'li kurash bo'yicha kattalar terma jamoasi bosh murabbiyi SHavkat Mirzaqulov so'zga chiqib, ishtirokchilarni qutlashdi va ularga bellashuvlarda omad tilashdi.

Qizg'in va murosasiz kechgan musobaqa yakunida umumjamoa hisobida eng ko'p medallarni qo'lga kiritgan Farg'ona viloyati jamoasi faxrli birinchi o'rinni egalladi. Ikkinchi o'rin Namangan viloyati polvonlariga nasib etgan bo'lsa, Toshkent viloyati jamoasi uchinchi o'rinni band etdi.

SHu tariqa, milliy sportimiz rivojiga xizmat qiluvchi mazkur musobaqa kuchli polvonlarni aniqlash va mamlakat milliy terma jamoasiga munosib nomzodlarni aniqlashga xizmat qilishi bilan ahamiyatli bo'ldi. 

Ilhom RAHMONOV tayyorladi