Berlin aeroportida o'tkaziluvchi turnirga qura tashlandi

Bugun u erda erkak va ayol tennischilar ishtirokidagi bett1 Aces turniri start oladi. 19 iyul kuni g'oliblari aniqlanadigan musobaqaning erkaklar o'rtasidagi bahslarida avstriyalik Dominik Tim va ispaniyalik Roberto Bautista-Agut 1/2 finaldan o'z ishtiroklarini boshlaydigan bo'ldi. 

Bu bosqichda dunyoning uchinchi raketkasi bo'lib turgan Tim germaniyalik tennischilar - Tommi Xaas yoki Yan-Lennard SHtruffga qarshi kortga chiqadi. Bautista-Agut esa rossiyalik Karen Xachanov hamda italiyalik Yannik Sinner bahsi g'olibi bilan to'qnash keladi.

Ukrainalik Elina Svitolina va chexiyalik Petra Kvitova ayollar o'rtasidagi turnirning yarim finalidan o'z yurishlarini boshlaydi. Svitolinaning raqibasi latviyalik Anastasiya Sevastova hamda niderlandiyalik Kiki Bertens uchrashuvidan so'ng aniqlanadi. Kvitova esa germaniyalik tennis malikalari - Andrea Petkovich yoki Aleksandra Vechichga qarshi kortga chiqadi.