Besh nafar shaxmatchimiz yuz foizlik natija qayd etmoqda

Bu yil o'z tarixida 18-marotaba tashkil etilayotgan, mukofot jamg'armasi 75 000 AQSH dollarini tashkil qiluvchi turnir shveycarcha tizimda 10 turdan iborat bo'ladi. Ishtirokchilar ikki guruhda sovrinli o'rinlar uchun bahs olib borishyapti. Asosiy hisoblangan A guruhida 1800 va undan yuqori reytingli shaxmatchilar jam bo'lgan. V guruhida esa reytingi 1999 va undan past bo'lgan ishtirokchilar dona surmoqda. 

Kuchlilar jam bo'lgan A guruhida hindistonlik xalqaro grossmeyster Nihal Sarin (2687) birinchi raqam ostida saralangan. U 1-turda hamyurtimiz Behruz Umarov (2218)dan ustun kelgandi. Ikkinchi turda esa ochko yo'qotdi. Sarin mo'g'ulistonlik Sumiya CHinguun bilan durang o'ynadi. Ikkinchi raqamli shaxmatchi sifatida tasniflangan yosh grossmeysterimiz SHamsiddin Vohidov (2670) kutilmagan natijalari ikkinchi turda ham davom etdi. U oq donalarda o'ynashiga qaramay, reytingda o'zidan ancha quyida borayotgan rossiyalik Mixail Panin (2189)ni mag'lub eta olmadi. 

Grossmeysterimiz Muhiddin Madaminov (2550) rossiyalik Semen Novojilov (2344) bilan murosaga keldi. Ikkinchi turdan keyin 5 nafar shaxmatchimiz yuz foizlik natija bilan peshqadamlar safida borishyapti. Almas Rahmatullaev, Abdumalik Abdusalimov, Sayidakbar Saydaliev, Humoyun Begmuratov va Muhammadzohid Suyarov har ikki turda ham raqiblarini mag'lubiyatga uchratishdi. 

Grossmeysterlarimizdan biri Ortiq Nig'matov (2501) kutilmaganda rossiyalik Dmitriy Rostovcev (2292)ga yutqazib qo'ydi. Uchinchi tur oldidan vengriyalik grossmeyster Sanan Syugirov (2631) qo'shimcha ko'rsatkichlarga ko'ra peshqadamlik qilyapti. Jami 21 nafar shaxmatchi hali ochko yo'qotmagan. Bugun 3-tur uchrashuvlari soat 15:00da boshlanadi.