Birozdan so'ng Istomin Almati turnirida bosh sovrin uchun kortga chiqadi

Sovrin jamg'armasi 50 000 AQSH dollarini tashkil qiluvchi ushbu turnirda hamyurtimiz Denis Istomin birinchi raqam ostida harakat qilyapti. Osiyo o'yinlari g'olibi Almatida ham g'olibona yurishini davom ettirmoqda. 

Kecha vakilimiz o'z vaqtida dunyoning 24-raketkasi bo'lgan chexiyalik Lukash Rosolni 1 soatu 46 daqiqa davom etgan murakkab yarim final uchrashuvida 3:6, 6:3, 6:4 hisobida mag'lub eta olgandi. Bugun u bosh mukofot uchun kortga chiqadi. 

Denisning finaldagi raqibi ATP reytingida 201-o'rinni egallab turgan Nikola Miloevich bo'ladi. Serbiyalik bu tennischi kecha yarim finalda dunyoning 77-raketkasi bosniyalik Mirza Bashichni roppa-rosa 2 soat davom etgan bahsda 3:6, 7:6(3), 6:3 hisobida mag'lub etdi. 

Malumot uchun, Istomin Miloevich uchrashuvi Toshkent vaqti bilan soat 10:00da boshlanadi. Bu ikki tennischi shu kungacha o'zaro bir marotaba to'qnash kelishgan. Ikki yil avval aynan Qozog'istondagi “CHellenjer” turnirida Istomin raqibidan ustun kelgandi. Aniqrog'i, birinchi setni 2:6 hisobida boy bergan Miloevich ikkinchi setga chiqmagan edi.