"Blois Challenger 80". Bir paytda ikki kortda o'zbek - ispan "dueli" bo'lib o'tdi

"Blois Challenger 80" musobaqasining saralash bosqich bahslarida ikki hamyurtimiz ham o'z imkoniyatini sinovdan o'tkazdi. Istedodli tennischimiz, Qozog'istondagi muvaffaqiyatidan so'ng reytingda katta o'sishga erishgan Sergey Fomin hamda Sanjar Fayziev bir paytning o'zida ikki kortda ispaniyalik raqiblariga qarshi bahs olib borishdi.

ATP reytingida 408-pog'onadan joy olgan Fomin dunyoning 298-raketkasi Nikolas Sanches Iskierdoga munosib qarshilik ko'rsatdi va hatto g'alabaga ham yaqin edi. Birinchi setni 7/5 hisobida o'z foydasiga hal qilgan Sergey ikkinchi setda mag'lubiyatga uchradi - 2/6. Hal qiluvchi uchinchi setda breyk-poyntni amalga oshirgan Fomin afsuski, bu ustunlikdan foydalana olmadi - 4/6. Ushbu uchrashuv 2 soatu 25 daqiqa davom etgan. Fomin 7, Sanches 5 ta eys zarbasini amalga oshirdi.    

Bu uchrashuv bilan parallel ravishda qo'shni kortda yana bir o'zbek-ispan qarama-qarshiligi bo'lib o'tdi. ATP reytingida 704-pog'onadan joy olgan hamyurtimiz Sanjar Fayziev dunyoning 251-raketkasi Xaver Barranko Kozanoga 4/6, 4/6 hisobida imkoniyatni boy berib qo'ydi. Bir soatu 24 daqiqa davom etgan bahsda Sanjar 10, Xavber 8 ta eys zarba ijro etdi. Har ikkala uchrashuvda ham tajriba o'z so'zini aytdi.