Bugun blic bo'yicha jahon chempionati boshlanadi

Uch kun davom etgan rapid bo'yicha jahon chempionatida g'olib va sovrindorlar aniqlangan edi. Erkaklar o'rtasida rossiyalik 18 yashar iqtidor egasi Volodar Murzin 10 ochko bilan jahon chempioniga aylangandi. Uning vatandoshlari Aleksandr Grishuk (2675) 9,5 ochko bilan ikkinchi o'rinni egallagan bo'lsa, shuncha ochkoga ega Yan Nepomnyashiy (2758) qo'shimcha ko'rsatkichlarga ko'ra kuchli uchlikka yakun yasab bergandi. O'zbekistonlik shaxmatchilar orasida eng yaxshi natijaga Javohir Sindarov (2655) erishdi. U 13 imkoniyatdan 9 ochko jamg'arib, qo'shimcha ko'rsatkichlarga ko'ra 6-o'rinni egalladi. 

Ayollar o'rtasida esa Hampi Koneru (Hindiston, 2431) jahon chempioni bo'ldi. Jahon chempionatida qatnashayotgan yagona vakilamiz rapid bahslarida shov-shuvli natija qayd etdi. Afruza bir necha jahon chempionlarini mag'lubiyatga uchratib, yakunda chempiondan bor yo'g'i yarim ochko kam to'pladi. Kuchli uchlikdan joy olgan Ju Ven Jun (Xitoy, 2536) va Katerina Lagno (FIDE, 2433) bilan bir xilda ochko jamg'arib, sovrinli o'rinlardan chetda qolgani biroz alamli bo'ldi. 

Bugun jahon chempionatida blic, yani tezkor shaxmat bahslari start oladi. Bugunning o'zida 13 ta partiya o'tkaziladi. Ertaga esa pley-off bosqichi - 1/4, 1/2 va final bahslari tashkil etiladi. Erkaklar o'rtasidagi musobaqada Nodirbek Abdusattorov (2707), Javohir Sindarov (2628), SHamsiddin Vohidov (2593), Jahongir Vohidov (2546) va Muhiddin Madaminov (2471) yurtimiz sport sharafini himoya qiladi. Ayollar o'rtasidagi blic bahslarida Afruza Hamdamovaga muxlislik qilamiz.