Bugun Istomin turnirning ikkinchi raketkasiga qarshi kortga chiqadi

Xabar berganimizdek, ushbu turnirda hamyurtimiz Denis Istomin ham muvaffaqiyatli odimlayapti. Mamlakatimizning birinchi raketkasi bugun ikkinchi davrada turnirning ikkinchi saralangan tennischisi Filipp Kolshrayberga qarshi o'yin o'tkazadi.

Taqqoslash uchun, Istomin dunyo reytingida 95, germaniyalik tennischi esa 29-o'rinni egallab turibdi. Tennischilar shu kungacha o'zaro 5 marotaba to'qnash kelishgan. Uchta uchrashuvda Denis, qolgan 2ta bahsda Filippning qo'li baland kelgan. 

So'nggi bor ular shu yilning 12 iyun kuni SHtutgartdagi turnirda uchrashishgan edi. O'shanda Istomin kuchli raqibini ikki setda mag'lub etishning uddasidan chiqqandi. Istomin -Kolshrayber bahsi bugun bizning vaqt bilan soat 16:00da boshlanishi belgilab qo'yilgan. 

Eslatib o'tamiz, hamyurtimiz Avstriya turnirini saralash bosqichidan boshlagan va ikki raqibini mag'lub etgan holda asosiy to'rga yo'l olgandi. Denis musobaqaning asosiy davra ilk o'yinida esa argentinalik Federiko Delbonisdan 7:6, 6:2 hisobida uchtun kelgan edi.