Bugun Namanganda “Fyuchers” turniri boshlanadi, Sabina birinchi raketka!

Bugun sovrin jamg'armasi 25 000 AQSH dollarini tashkil qiluvchi ushbu musobaqada saralash bahslari yakunlanib, asosiy to'rga yo'llanma olgan barcha tennischilarning nomi malum bo'ladi. 

Hamyurtlarimizdan asosiy to'rda to'g'ridan-to'g'ri qatnashish huquqini Sabina SHaripova, Nigina Abduraimova, Arina Folc, Valentina SHleyn hamda Setora Normurodovalar qo'lga kiritishdi. Sabina, Nigina va Arina o'z reyting o'rinlari bilan bunga erishishgan bo'lsa, Valentina va Setoraga tashkilotchilar imtiyozli yo'llanma taqdim etishdi. 

Eslatib o'tamiz, shanba kuni Andijonda yakunlangan xuddi shunday turnirda hamyurtimiz Sabina SHaripova bosh mukofot sohibasiga aylangandi. Hal qiluvchi final uchrashuvida turnirning birinchi raketkasi bo'lgan SHaripova sloveniyalik Kayya Yuvanni 6/4, 6/2 xisobida mag'lub etgandi.

Ushbu muvaffaqiyatli ishtirok Sabina SHaripovaga 50 reyting ochkosini taqdim etdi. Vatandoshimiz kelasi dushanba kuni elon qilinadigan WTA reytingida bir necha pog'onaga ko'tarilib oladi.