"Burgut" "Sariarka" va "Nomad"ning ikki tajribali hujumchisini olib keldi

Jamoa "Sariarka" klubidan Evgeniy Grigorenko hamda "Nomad"dan Dmitriy Makeevni o'z safiga qo'shib oldi. Ularning har ikkisi hujumchi hisoblanadi.

Malumot o'rnida takidlash joiz, Evgeniy Grigorenko Magnitogorsk "Metallurg"ining tarbiyalanuvchisi. Bo'yi 181 sm, vazni 84 kg. Oxirgi klubi "Sariarka" (Qarag'anda) bo'ldi. U Qozog'iston kubogini qo'lga kiritgan holda Qozog'istonda jami 50 ta o'yin o'tkazib, 46 (16+30) ochko jamg'argan. 

Grigorenko uzoq vaqt OXLda (145 o'yin 94 (41+53) ochko) va QXLda (194 uchrashuv 55 (26+29) ball) faoliyat yuritgan. Grigorenkoning hisobida Belarusning "Gomel" klubi safida ham 46 ta uchrashuv (38 (19+19) ochko) bor. SHuningdek, u bir vaqtlar Toshkentning "Humo" xokkey klubida ham faoliyat olib borgan.

Dmitriy Makeev esa Pavlodar xokkey maktabi tarbiyalanuvchisi. Bo'yi 178 sm, vazni 77 kg. U Qozog'iston chempionatida o'z faoliyatini 2020 yilda boshlagan, "Snejnie Barsi" safida 47 ta o'yin (4+10 ochko) o'tkazgan. 2022 yilda Petropavlovskning "Qulager"ida (52 o'yin, 11+15 ochko) bir mavsum o'tkazgandan so'ng, Dmitriy "Baris" tizimiga qaytdi - avvaliga tanish bo'lgan "Snejnie Barsi" tarkibida, keyin esa "Nomad"da o'ynadi.